ПОРТУГАЛИД ШАТАХУУН ТЭЭВЭРЛЭГЧ МАШИНЫ ЖОЛООЧ НАР АЖИЛ ХАЯЛТ ЗАРЛААД БАЙНА

Португалийн шатахуун тээвэрлэгч машины жолооч нарын үйлдвэрчний эвлэл хугацаагүй ажил хаялт зарласан байна. Жолооч нар цалин хөлсөө нэмэгдүүлэх, ажлын нөхцөлийг сайжруулах шаардлага тавьжээ. Тухайлбал, шатахуун тээвэрлэгч машины жолоочийн хөдөлмөрийн хөлсний доод хэмжээг одоо байгаа 630 еврогоос нэмэгдүүлж, хоёр жилийн дотор 900 евро болгохыг шаарсан байна.

Үүнээс болоод нийслэл Лиссабонд 430 ШТГ шатахуунгүй болж үйл ажиллагаа түр зогсооход хүрсэн.

Гэвч Португалийн Ерөнхий сайд Антониу Кошта нь аялал жуулчлалын улирлын үеэр эмнэлэг, нисэх буудлуудад шатахууны дутагдал үүсгэхгүй гэж мэдэгдээд хуулийн дагуу ШТГ-ыг хэвийн ажиллагаанд шаардлагатай хамгийн бага хэмжээний түлшээр хангах тушаал буулгажээ. Тушаалыг зөрчин шатахуун хүргээгүй тохиолдолд хуулийн дагуу шийтгэнэ гэсэн байна.

Иймд ажил хаялтад оролцсон зарим жолооч зөвхөн ажлын найман цагийн хүрээнд зөөж амжих хэмжээний шатахуун зөөгөөд, илүү цагаар ажиллахгүй гэж мэдэгджээ. Зарим хотуудын хооронд шатахуун зөөсөн тэрэг 8 –аас илүү цаг явж хүрдэг тул ажил хаялтын үр дагавар бүрэн арилахгүй. Иймд ШТГ-т нэг машинд 15 эсвэл 25 литрээс илүү хийхгүй байх хязгаарлалт тогтоогоод байна.