​ХОНКОНГИЙН НИСЭХ БУУДАЛ БҮХ НИСЛЭГЭЭ ЦУЦЛААД БАЙНА

Хонконгийн нисэх буудал эсэргүүцлийн жагсаалаас болж наймдугаар сарын 12-ны бүх нислэгийг цуцлан хойшлуулаад байгаа тухай "Reuters" агентлаг мэдээлж байна. Нисэх буудалд цугласан олон мянган жагсагчид нисэх буудлыг хэвийн ажиллахад саад болж, зорчигчдын аюулгүй байдалд заналхийлж байгаа тул ийм арга хэмжээ авахаас өөр аргагүй болж.

Бээжингийн бодлогыг эсэргүүцэгчид баасан гарагаас эхлэн Хонконгийн нисэх буудалд эсэргүүцлийн арга хэмжээ явуулахаа зарлаад байсан юм. Энэхүү арга хэмжээг гурав хоног явуулаад зогсооно гэж байсан ч ням гарагт Хонконгт болсон эсэргүүцлийн жагсаалыг цагдаа нар тараах явцад нэг хүний нүдийг тэс буудсан хэрэг гарсны дараа эсэргүүцлийн арга хэмжээг үргэлжлүүлэхээр шийджээ.

Энэ бүхнээс Бээжингийн тэвчээр барагдаж эхэлж байгаа бололтой. Хятадын Төрийн зөвлөлийн Хонконг ба Макаогийн хэрэг хариуцсан захиргааны албан ёсны төлөөлөгч Ян Гуан "Жагсагчид сүүлийн үед цагдаагийн ажилтнууд руу дайрахдаа тун аюултай эд зүйл ашиглах болсон төдийгүй алан хядлагын үр соёолоод эхэлсэн байна" гэжээ. Үүний жишээ болгож жагсагчдын зүгээс цагдаа нарын эсрэг шатах шингэн бүхий лонх шидсэн явдлыг дурджээ. Эсэргүүцэгчдийн энэ мэт үйлдэл нь орон нутгийн иргэдийн аюулгүй байдалд заналхийлээд зогсохгүй, бүс нутгийн тогтвортой байдлыг бүхэлд нь асуудалтай болгож байгааг Ян Гуан онцолсон байна.