” VERSACE” ХЯТАДЫН ЭРХ БАРИГЧДААС УУЧЛАЛ ГУЙЖЭЭ

Дэлхийд алдартай "Versace" брэнд нь БНХАУ-ын захиргааны зарим нэгжийг тусгаар улс гэж заасан футболка, юүдэнтэй цамц худалдаанд гаргасны төлөө Хятадын эрх баригчдаас уучлал гуйсан тухай "China Daily" сонин мэдээлж байна.

Алдаатай бичээс бүхий цамцан дээр Хонконг, Макао тусгай дүүргүүдийг тусгаар улс гэж тэмдэглэсэн байжээ. Иймд "Versace" брэнд нь уучлал гуйхдаа "Энэ бол бидний гаргасан алдаа бөгөөд үүнээс болж гарсан үр дагаварт гүнээ харамсаж байна. Бид Хятадад хайртай, түүний газар нутгийн болон үндэсний тусгаар байдлыг хүндэлдэг" гэжээ. Алдаатай бичээстэй бүх цамцыг буцаан татаад устгасан гэдгээ "Versace" мэдээлжээ.

Үүнээс өмнө "Dolce&Gabbana" брэнд нь савхаар пицца, шпагетти идэх гээд чадахгүй байгаа хятад жүжигчинтэй бичлэг цацаад буруудсан тохиолдол гарч байсан юм. Энэ бичлэг гарсны дараагаар Хятадын хэрэглэгчид "Dolce&Gabbana"-г арьсны өнгө, яс үндсээр ялгаварлан гадуурхсан үзлийг сурталчилсан гэж хүчтэй шүүмжилсэн юм. Үүнээс болоод олон алдартнууд тус брэндтэй хамтарч ажиллахаас татгалзаж, Шанхайд зохиогдох гэж байсан том арга хэмжээ нь цуцлагдсан. Улмаар Хятадын хамгийн том интернент дэлгүүрүүд тус брэндийн бүтээгдэхүүнийг борлуулахаас татгалзахад "Dolce&Gabbana" брэндийн бүх л бүтээгдэхүүний борлуулалт нэлээд унасан юм. Үүний дараа брэндийг эзэмшигч ах дүү Доменико Дольче ба Стефано Габбана нар нь Хятадын хэрэглэгчдэд хандан хятад хэл дээр албан ёсоор уучлал гуйж байсан юм.

Хятадын эдийн засгийн хүч өсөн нэмэгдэхийн хэрээр иргэдийнх нь худалдан авах чадвар ч эрс нэмэгдэх болсон. Улмаар тус улс нь дэлхийн хамгийн том бөгөөд худалдан авах чадвар хамгийн сайтай зах зээл болж хувираад байгаа. "Dolce&Gabbana", "Versace" зэрэг тансаг зэрэглэлийн өндөр үнэтэй бүтээгдэхүүн зардаг комданиудын хувьд Хятадын зах зээл нь хамгийн том, идэвхтэй өсөн нэмэгдэж байгаа зах зээл юм. Энэ зах зээлийн алдах нь бараг дампуурсантай адил зүйл болно гэж шинжээчид үздэг.