ХОНКОНГИЙН СӨРӨГ ХҮЧНИЙХЭН ЭСЭРГҮҮЦЛИЙН ЖАГСААЛАА ҮРГЭЛЖЛҮҮЛСЭЭР БАЙНА

Хонконгийн сөрөг хүчнийхэн Бээжингийн бодлогыг эсэргүүцсэн жагсаалаа үргэлжлүүлсээр байна. Ням гарагт Хонконгийн Козуэй –бэй, Шам Шуй По дүүргүүдэд олон мянган хүн оролцсон жагсаал болж байгаа тухай орон нутгийн ТВ сувгууд мэдээлж байна. Жагсаал тайван хэлбэрээр болж, элдэв түрэмгий авир гаргахгүй байгаа тул цагдаа нар ч жагсагчдыг тараах ямар нэг арга хэмжээ аваагүй. Харин бямба гарагт болсон жагсаалын үеэр түрэмгий авир гаргасан 20 орчим идэвхтнийг цагдаа нар баривчилсан байна.

Хонконгийн цагдаагийн дарга Луи Лау нь жагсагчдын зарим нь хүчтэй лазер гэрэлтүүлэгчийг цагдаа нарын нүд рүү тусгаж байгаад буруушаасан мэдэгдэл хийж. Лазер заагчийн гэрэлд нь нүд гэмтсэн есөн цагдаа тусламж авахаар нүдний эмчид хандаад байгааг цагдаагийн дарга онцлов. Цаашид жагсагчид лазер заагч ашиглахыг цагдаа руу дайрсантай адилтган үзэж, зохих арга хэмжээ авах болно гэдгийг анхааруулжээ.

Жагсагчид нь олон мянган хүнийг царайгаар нь ялган таних чадвартай тусгай системийн ажиллагааг алдагдуулах үүднээс хүчтэй лазер бүхий чиглүүлэгч ашиглах нь элбэг болоод байгаа юм.

Үүнээс гадна Чек Лап Кок олон улсын нисэх буудалд сөрөг хүчнээс зохион байгуулсан эсэргүүцлийн жагсаал тасралтгүй үргэлжилж байна. Бээжингийн бодлогыг эсэргүүцэгчид нисэх буудлын хүлээлгийн танхимд цугларч уриа хашгарч байгаа ч үйл ажиллагааг нь алдагдах үйлдэл хийхгүй байгаа аж.

Энэ зуур Хонконгийн эсэргүүцлийн жагсаалтай холбоотойгоор Бээжин ба Вашингтон хоёрын харилцаа улам муудсаар байна. Наймдугаар сарын 10-нд АНУ-ын Төрийн департаментын хэвлэлийн төлөөлөгч Морган Ортагус Twitter хуудсан дээрээ "Хонконг дахь манай дипломатын талаар тараасан Хятадын албаны ёсны хариуцлагагүй мэдэгдлүүд нь аюултай болж хувирлаа. Үүнийг болиулах хэрэгтэй" гэж жиргэжээ.

Энэхүү мэдэгдэл нь Хонконгийн "Ta Kung Pao" сонинд гарсан "Гадаадын хүчний оролцоо" нэртэй нийтлэлтэй холбоотой аж. Тус нийтлэлд Хонконг дахь АНУ-ын Консулын газрын ажилтан Жулия Идэ-г эсэргүүцлийн хөдөлгөөний удирдагч оюутнуудтай уулзалт хийж байгаа зургийг нийтэлсэн юм. Үүний дараагаар Хятадын Гадаад харилцааны яамны Хонконг дахь салбар АНУ-д хандан дипломат ажилтан нь эсэргүүцлийн хөдөлгөөний идэвхтнүүдтэй уулзаж байгаа талаар тайлбар өгөхийг шаардсан.

Үүнээс төд удалгүй Хятадын мэдээллийн зарим хэрэгслээр уулзалт зохион байгуулсан дипломат ажилтны хувийн мэдээлэл төдийгүй хүүхдүүдийнх нь нэр, хаягийг тараасан тул Төрийн департаментын төлөөлөгч бухимдсан нь энэ аж. Хятад нь АНУ тэргүүтэй өрнөдийн орнуудыг Хонконгт болж байгаа эсэргүүцлийн хөдөлгөөнд хөндлөнгөөс оролцон дэвэргэж байна гэж удаа дараалан буруутгаж байгаа юм.