ӨМНӨД СОЛОНГОСЫГ НАЙДВАРТАЙ ТҮНШҮҮДИЙН ЖАГСААЛТААС ХАСЧЭЭ

Японы ба Өмнөд Солонгос хоорондын сөргөлдөөн улам л лавшрах хандлагатай болж байна. Жишээлэхэд, наймдугаар сарын 7-нд Японы Засгийн газар нь Өмнөд Солонгосыг худалдааны найдвартай түнш улсуудын жагсаалтаас хасчээ. Энэхүү жагсаалтад багтсан орнуудад Япон нь экспортын хөнгөлөлт үзүүлдэг. Ингэснээр наймдугаар сарын 28-аас эхлэн экспортын чанарт илүү өндөр шаардлага тавьж эхэлнэ.

Японы Засгийн газар нь цаашдаа ч худалдааны хөнгөлөлт үзүүлэхгүй барааны жагсаалтаа нэмнэ гэдгээ мэдэгдсэн байна. Тухайлбал, батлан хамгаалах салбарт ашиглаж болох зарим бүтээгдэхүүнийг худалдан авахын тулд Худалдааны яамны зөвшөөрөл шаардлагатай болж магадгүй гэжээ.

Өмнөд Солонгосын шүүх нь дэлхийн хоёрдугаар дайны үеэр Японы үйлдвэрүүдэд албадлагаар ажиллаж байсан хүмүүсийн ар гэрт их хэмжээний нөхөн олговор олгох шийдвэр гаргаж, Японы компаниудын хөрөнгийг хурааж эхэлсэн. Үүний хариуд Япон ийм худалдааны хориг арга хэмжээ авч эхэлсэн. 2019 оны долоодугаар сард электрон бараа бүтээгдэхүүний үйлдвэрлэлд ашигладаг ховор материалыг Өмнөд Солонгос руу экспортлоход хязгаар тогтоож байсан юм.

Үүний хариуд Өмнөд Солонгосын иргэд япон бараа бүтээгдэхүүн худалдан авахгүй байх, Япон руу аялал жуулчлал хийхээс татгалзах кампанит ажил явуулах болсон.