ӨМНӨД СОЛОНГОСООС ЦАГААЧЛАГЧДЫН ТОО ОГЦОМ ӨСЧЭЭ

Өмнөд Солонгосыг орхин өөр улсад байнга оршин суухаар явагчдыг тоо сүүлийн жилүүдэд ихээхэн нэмэгдэж байгаа тухай "Чосон Ильбо" сонин Гадаад харилцааны яамны судалгааг иш татан мэдээлсэн байна.

Тухайлбал, өнгөрсөн жил Өмнөд Солонгосоос 2200 хүн цагаачлан гадаад руу гарсан нь 2016 оныхоос даруй тав дахин өндөр үзүүлэлт аж. Үүнтэй адил байдал 2008 онд л ажиглагдаж байжээ.

Цагаачилсан хүмүүс улс төр ба эдийн засгийн нөхцөл байдал, үл хөдлөх хөрөнгийн өндөр үнэ, боловсрол авахад бэрхшээлтэй болсон зэрэг нь эх орноо орхин явахад хүргэсэн үндсэн шалтгаан гэж заасан байна. Мөн өндөр татварыг Солонгосын иргэншлээс татгалзах гол шалтгаан гэжээ. Татвар өндөр байгаад баян солонгосчууд ихэд дургүйцэж байгаа аж. Тодруулбал, 20 сая доллар ба түүнээс их хөрөнгө өвлөн авбал талаас илүү хувийг нь татварт өгөх ёстой байдаг аж. Мөн хүнд үйлдвэрлэл өндөр хөгжсөн тул экологийн байдал муудаж, хүүхдийн өсөлт хөгжилд сөргөөр нөлөөлж байгаа явдал ч цагаачлах нэг шалтгаан болжээ.

Солонгосчуудын цагаачлан гарах хамгийн дуртай орнуудаар Вьетнам, Филиппин, Малайз, Тайланд улсууд тодорчээ.