ОХУ-ЫГ МАРГААНТАЙ АРЛУУД ДЭЭР ХЭЭРИЙН СУРГУУЛЬ ХИЙЛЭЭ ГЭЖ ЯПОН УУРЛАЖЭЭ

ОХУ нь өөрийн газар нутгийн нэг хэсэг, Кунашир арал дээр цэргийн хээрийн сургууль хийсэнтэй холбогдуулан Япон эсэргүүцэл илэрхийлсэн тухай "Kyodo" агентлаг мэдээлж байна. Японы сайд нарын зөвлөлийн Ерөнхий нарийн бичгийн дарга Ешихида Суга нь "Хойд нутагт Орос цэргийн хүчээ зузаатгаж байгаа нь манай байр суурьтай нийцэхгүй бөгөөд байж боломгүй зүйл "гэжээ. Курилын арлууд дээр хийж байгаа Оросын хээрийн сургууль наймдугаар сарын 5-10 өдрүүдэд явагдана.

Үүнээс өмнө ОХУ-ын Ерөнхий сайд Дмитрий Медведевийг Алс Дорнодын нутгаараа айлчлах явцад Курилын арлууд дээр нисч ирэхэд Японы Гадаад харилцааны яам мөн л эсэргүүцэл илэрхийлж байсан юм. Тэгэд Японы ГХЯ нь Медведев Курилын арлууд дээр ирсэн явдал нь "Японы иргэдийн сэтгэлийг эмзэглүүлсэн бөгөөд туйлын харамсалтай зүйл боллоо" гэж байсан. Хариуд нь Оросын Засгийн гарын тэргүүн нь Токиогийн зүгээс эсэргүүцэл илэрхийлсэнд огт санаа зовохгүй байгаагаа онцлоод "Энэ бол манай газар нутаг, ОХУ-ын субъект, эдгээр арлууд нь Сахалин мужид багтдаг юм" гэж тайлбарласан.

Япон нь Өмнөд Курилын Итуруп, Кунашир, Шикотан ба Хабомаи жижиг арлуудын бүлгийг өөрийн газар нутаг гэж үздэг бөгөөд "хойд нутаг" гэж нэрлэдэг. ОХУ нь эдгээр арлуудыг Дэлхийн хоёрдугаар дайны төлбөр болгон олон улсын хуулийн дагуу өөрийн болгосон гэдгийг онцолдог.