ДУГУЙТАЙ ЖУУЛЧИН РУУ БААВГАЙ ДАЙРЧЭЭ

Канадын алс бөглүү газраар дугуйтай аялал хийж явсан хүн гризли баавгайн дайралтад өртсөн тухай "CTV News" мэдээлсэн байна. Колин Даулер гэгч 45 настай хүн Британийн Колумби мужид дугуйтай аялал хийж явахад нь зам дээр гризли баавгай гарч иржээ. Жуулчин эр баавгайтай юм ярьж тайвшруулах гэж оролдсон ч бүтлийг олсонгүй, баавгай түүн рүү дайран унагаж, гуянаас нь зуугаад замын хажуу руу чирч эхэлсэн байна. Колин Даулер дайралтын талаар "Би зуултыг нь тавиулах гэж байтал гарнаас хазаад авсан. Тэгэхээр нь халаасандаа хутагтай явснаа санаад хутгаа гарган баавгайн хүзүү рүү зоосон. Баавгай ч тэр даруй намайг орхиод зугтсан" гэжээ.

Шархадсан Даулер цамцныхаа ханцуйг хутгаараа таслан хөлдөө боолт хийж, дугуй руугаа мөлхөж хүрээд, арай хийж дугуйндаа суун долоон км зам туулан жуулчны отог орж чадсан байна. Тэнд түүнд анхны тусламж үзүүлээд нисдэг тэргээр Ванкувер дахь эмнэлэг рүү хүргэжээ.

Жуулчны отгийн тогооч нь Даулерын шархны талаар "Нуруунаас нь бөөр байдаг хэсгээс нь ястай стейкийн чинээний махыг тас хазаад авсан байсан. Ер нь харахаас ч аймаар том шарх олон байсан" гэж сэтгүүлчдэд ярьжээ.

Даулерт эмнэлэгт яаралтай тусламж үзүүлсэн тул амь насанд нь аюулгүй болсон. Харин түүн рүү дайрсан баавгайг байгаль хамгаалах албаны дөрвөн ажилтан мөрөөр мөшгөн олоод устгасан байна.