НИСДЭГ ТАВЦАНГААР ЛА МАНШ ХООЛОЙГ ДАВЛАА

Францын зохион бүтээгч Франки Запата нь хоёр дахь удаагийн оролдлогоороо Ла Манш хоолойг давж амжилттай ниссэн тухай "РИА Новости" агентлаг мэдээлж байна. Нислэг 20 минут орчим үргэлжилсэн бөгөөд энэ хооронд Запата 35 км замыг туулан амжилттай газарджээ.

Үүнээс өмнө долоодугаар сарын 25-нд Запата эхний удаад Ла Манш хоолойн дээгүүр нисэх оролдлого хийхэд замын талд нисдэг тавцангийнх нь хөдөлгүүр унтарч усанд унасан. Запата нь нисдэг тавцан гэж нэрлэгдсэн төхөөрөмжийг зохион бүтээсэн бөгөөд 2016 оноос эхлэн олон нийтэд танилцуулан янз бүрийн нислэг хийж байгаа. Анхны нислэгийг нуурын дээр хийхэд цагт 55 км-ийн хурдтайгаар 4 минут нисч байсан юм. Түүнээс хойш тавцангаа байнга сайжруулж ирсэн бөгөөд Ла Манш хоолойн дээгүүр цагт 160 км-ийн хурдтайгаар ниссэн байна.