АНУ ҮНДЭСНИЙ ГАШУУДЛЫН ӨДӨР ЗАРЛАЛАА

АНУ-ын Техас мужийн Эль Пасо хотод зэвсэглэсэн этгээд худалдааны төвд энгийн иргэд рүү гал нээж 20 хүний аминд хүрчээ. Наймдугаар сарын 3-нд Эль Пасо хот дахь "WalMart", "Cielo Vista Mall" худалдааны төвүүдээр үйлчлүүлж байгаа хүмүүс рүү замбараагүй буудаж эхэлсний улмаас 20 хүн амиа алдаж, 40 шархадсанаас 9 хүний бие үхэл амьдралын зааг дээр байгаа аж. Гал нээсэн этгээдийг цагдаагийн тусгай хүчнийхэн саатуулжээ. Буудсан этгээд нь 21 –н настай Патрик Крузиус гэгч байсан бөгөөд аллага үйлдэхийн өмнө Twitter хуудсан дээрээ энэ оны гурван сард Шинэ Зеландад лалын сүмд гал нээж олон хүний аминд хүрсэн гэмт хэрэгтний үйлдлийг дэмждэг, үйлдлээрээ хууль бус цагаачдаас улсаа аврах гэж байгаа тухай мэдэгдэл гаргасан байжээ.

АНУ-ын Ерөнхийлөгч Дональд Трамп энэхүү аймшигт хэргийг буруушаасан мэдэгдэл хийж "Техас мужийн Эль Пасод болсон буудлага нь эмгэнэлтэй төдийгүй аймхай хулчгар зангийн илрэл мөн" гээд төв засгийн газраас орон нутгийн эрх баригчдад шаардлагатай бүх л тусламжийг үзүүлнэ гэсэн байна. Үүнтэй холбоотойгоор АНУ-ын Ерөнхийлөгч Дональд Трамп амиа алдагсдын дурсгалыг хүндэтгэн гурван өдрийн үндэсний хэмжээний гашуудал зарлажээ.

Энэ хэргийг тойрсон дуулиан намжиж амжаагүй байтал бас нэгэн мужид зэвсэглэсэн этгээд энгийн иргэд рүү буудсан хэрэг гарчээ. Охайо мужийн Дейтон хотод үл мэдэгдэх этгээд баарны орчим хүмүүс рүү буудсан байна. Үүний улмаас таван хүн амиа алдаж, олон хүн шархаджээ. Хэргийн газар цагдаа болон аврах албаныхан ажиллаж байгаа тухай "BNO News" мэдээлсэн байна.