​ЦАГ АГААРЫН УРД ХОЖИД ҮЗЭГДЭЭГҮЙ ЦАГ ӨӨРЧЛӨЛТ АЙСУЙ

Ихээхэн хурдацтай явагдаж буй цаг агаарын өөрчлөлтийг судалсан олон улсын эрдэмтдийн бүлэг нь сүүлийн 2000 жил ажиглагдаагүй эрс өөрчлөлт гэж дүгнэсэн тухай "Science Alert" дурджээ.Бага мөстлөгийн эрин, дундад зууны үеийн цаг агаарын зохистой дулаарал зэрэг нь хүний үйл ажиллагаанаас үүдэлтэй одоогийн дэлхий дулаарлаас хамаагүй бага цар хүрээтэй явагдсан гэж эрдэмтэд үзэж байна. Мод, мөс, шүрэн арлын хуримтлал, агуйн хуримтлалаас авсан дээж, түүхэн баримт дээр тулгуурлан ийм дүгнэлт хийжээ.

Бага мөстлөгийн эрин нь дэлхийг бүхэлд нь хамарсан гэж үздэг энэхүү судалгааны явцад хүйтрэлт нь янз бүрийн цагт, дэлхийн өөр өөр газарт болсон цуврал үзэгдлүүдээс бүрдсэн бөгөөд нийтдээ дэлхийн талыг л хамарч байсныг тогтоожээ. Дундад зууны зохистой дулаарал ч мөн адил дэлхийн гадаргын ердөө 40 хувьд нь л агаарын хэм хамгийн өндөр болж байсан байна.

Гэтэл орчин үед явагдаж байгаа өөрчлөлт нь дэлхийн гадаргын 98 хувийг хамраад байна. Өрнөд Антарктидын хэсэг газарт л цаг агаарын өөрчлөлт нөлөөлөөгүй байгаа. Хамгийн гол нь цаг агаарын хямрал нь байгалийн жамаар тайлбарлах боломжгүй өргөн цар хүрээтэй явагдаж байгаа тул бүх үр дагаврыг нарийн тооцоход ихээхэн хүндрэлтэй аж.