​ХЯТАДЫН ШҮҮХ ХҮҮХДИЙН ЭСРЭГ БЭЛГИЙН ХҮЧИРХИЙЛЭЛТЭЙ ЭРС ХАТУУ ТЭМЦЭНЭ

БНХАУ-ын Дээд шүүхээс хүүхдийн эсрэг бэлгийн гэмт хэргийг тун ноцтой үр дагаварт хүргэдэг хамгийн жигшүүрт хэрэг тул цаазаар авах ялаар хайр найргүй цээрлүүлэх болно гэж мэдэгдсэн тухай "Синьхуа" агентлаг мэдээлж байна. Сүүлийн жилүүдэд ийм төрлийн хэрэг Хятадад илүү олон гарах болсон нь нийгэмд ихээхэн түгшүүр төрүүлээд байгаа тул ийм мэдэгдэл хийжээ.

Хятадын шүүхүүд 2017 оноос 2019 оны зургаадугаар сар хүртэл хүүхдийн эсрэг бэлгийн хүчирхийлэлтэй холбоотой 8332 хэргийг авч хэлэлцэн хэрэгтнүүдэд хатуу ял ногдуулжээ.Энэ зуур Хятадын Нийгмийн аюулаас хамгаалах яам нь онц ноцтой гэмт хэрэгт сэжиглэгдээд оргон зайлсан А зэрэглэлийн 50 гэмт хэрэгтнийг эрэн сурвалжилж байгаа тухай мэдээ тараасан байна. Тус яамнаас Хятадын иргэдэд хандан эдгээр хүмүүсийн талаарх чухал мэдээлэл өгвөл 100 мянган юаниар шагнана гэсэн байна. Залилан ба хүнд гэмт хэрэгт сэжиглэгдээд оргон зугтсан хүмүүсийг эрэн сурвалжлах кампанит ажлыг Хятад даяар явуулж байгаа аж. 2019 оны зургаадугаар сарын 14-өөс эхэлсэн энэхүү аяны хүрээнд одоогоор 57 мянга 106 оргодлыг баривчлаад байгаа аж. Эдгээрээс 7266 нь онц ноцтой гэмт хэрэг үйлдсэн гэж эрэн сурвалжлагдаж байсан, 1350 нь 5 жил хүртэл хугацаагаар оргон зугтсан, 345 нь 10 ба түүнээс олон жил оргон зугтсан хүмүүс байжээ.