ДЭМБ: 2030-2050 ОНД ХЭТ ХАЛУУНЫ УЛМААС ЖИЛ БҮР 38 МЯНГАН ХҮН АМИА АЛДАНА

Австрали, Европ, Америкийн судлаачид 2031-2080 оны хооронд 20 орны 412 гаруй засаг захиргааны нэгжийн нутаг дэвсгэрт хэт халалтаас үүдэлтэй нас барагсдын тоог урьдчилан тооцоолох загвар гаргасан байна. Хүлэмжийн хийн ялгарлын түвшин болон судалгаанд хамрагдсан бүс нутгийн хүн амын нягтрал хэр байх, уур амьсгалын өөрчлөлтөд бэлтгэх болон дасан зохицох стратеги хэрэгжүүлсэн байдал зэргээс хамааралтайгаар хэт халалтаас үүдэлтэй нас баралтын тоо ирээдүйд нэмэгдэх хандлагатай байгааг судалгаагаар тогтоожээ. Монаш их сургуулийн Байгаль орчны эпидемиологи болон биостатистикийн дэд профессор Гуо Юуминг"Сүүлийн үед дэлхийн олон оронд хэт халалт болж, үүнээс үүдэн олон хүн нас барж байгаа нь энэ талаар судлах хэрэгтэйг анхааруулж байна. Хэрвээ бид уур амьсгалын өөрчлөлтийг бууруулах болон үүнд дасан зохицох арга зам олохгүй бол ирээдүйд хэт халалтаас үүдэлтэй нас баралт өснө" гэжээ. Дэлхийн эрүүл мэндийн байгууллага 2030-2050 онд хэт халууны улмаас жил бүр 38 мянган хүн амиа алдана гэж тооцоолсон. Дэлхийн бүс нутгуудаас хойд Хятадын тал газарт (The North China Plain) энэ гамшиг хамгийн хүнд тусах гэнэ. 2100 он гэхэд 400 сая хүн оршин суудаг, хөдөө аж ахуй, газар тариалангийн бүс нутаг болох энэ хэсэгт цельсийн 35 хэмээс дээш халж, иргэдийн амь насанд аюул учруулах төлөвтэй байгаа аж. Ази, Африк, Латин Америкт нийтдээ 1.1 тэрбум хүн санхүүгийн боломжгүйгээс сэрүүцүүлэгч (air condition- er), хөргөгч бүхий орчинд амьдарч чадахгүй байгааг өөр нэг судалгааны тоо баримт мөн харуулжээ.

Эх сурвалж: Үндэсний шуудан