​ОЛОН МЯНГАН ХҮН ЛОХ-НЕСС НУУРЫН МАНГАСЫН ЭРЭЛД ГАРНА

Олон мянган хүн Лох-Несс нууранд амьдардаг гэх нууцлаг үлэмж биет амьтан, мангасын эрэлд гарахаар "Facebook"-оор дамжуулан нэгдээд байгаа тухай "BBC News" мэдээлж байна. "51-р бүс"-ийг дайрах хөдөлгөөнөөс санаа авсан 18 мянган хүн Лох-Несс нуурын нууцлаг үлэмж биетнийг хайхаар нэгдээд есдүгээр сарын 21-нд эрлийн ажиллагаа эхлүүлэхээр болсон байна.

Энэ мэдээ тархсаны дараагаар Усан дээр аврах ажиллагаа явуулах Британийн вангийн нийгэмлэг (RNLI) тус арга хэмжээний аюулгүй байдлыг хангах тал дээр ихээхэн санаа зовниж байгаагаа албан ёсоор мэдэгджээ. Тус албанаас нуурын ус маш гүн, хүйтэн атал нууран дээр хуучирсан моторт завьтай цөөн хэдэн сайн дурын аврагчид ажилладаг тухай анхааруулжээ. Улмаар ийм олон хүн усанд шумбан эрэл хайгуул хийж эхлэхэд аюултай байдал үүсвэл шуурхай арга хэмжээ авч амжихгүй байж магадгүй гэсэн байна.

Америкийн Цэргийн нисэх хүчний сургалтын төв байрладаг "51-р бүс"-ийг олноороо дайрч эзлээд харь гарагийнханы тухай бүх нууцыг дэлгэх хөдөлгөөн интернетээр өрнөөд байгаа. Энэхүү цэргийн бааз нь өндөржүүлсэн хамгаалалттай, хууль бусаар нэвтрэх гэсэн хүмүүсийн эсрэг гал нээх эрхтэй. Иймд тус хөдөлгөөнийг зохион байгуулагчид нь олон мянган хүн зэрэг дайрвал бүгдийг нь буудаж чадахгүй цөөн хэдэн нь нэвтрээд бүх үнэнийг олж мэднэ гэцгээж байгаа юм. Одоогоор тус хөдөлгөөнд 500 мянган хүн нэгдээд байгаа бөгөөд дайралт есдүгээр сарын 20-ны шөнийн 3 цаг эхэлнэ гэж товлосон байгаа.