​ЖУУЛЧДЫГ ХОРООСОН ХЭРЭГТНҮҮДЭД ЦААЗААР АВАХ ЯЛ ОНООВ

Мароккод гадаадын жуулчин хоёр эмэгтэйг хэрцгийгээр хөнөөж, тэр тухайгаа бичлэг хийж тараахаар завдсан гурван хэрэгтэнд шүүхээс цаазаар авах ял оноосон тухай "Deutsche Welle" мэдээлж байна.

Данийн Луиза Вестерагер, Норвегийн Марен Уеланди нарыг 2018 оны аравхоёрдугаар сард Мароккогийн Имлиль тосгоноос холгүй толгойг нь таслан хэрцгийгээр хөнөөсөн байхыг нь олсон байдаг. Мароккогийн цагдаа нар тусгай арга хэмжээ авсны хүчинд аллагыг үйлдсэн этгээдүүдийг баривчлаад байсан юм. Харамсалтайгаар амиа алдсан жуулчдын ар гэр нь Мароккогийн шүүхэд хандан хэрэгтнүүдэд ялын дээд хэмжээ ногдуулахыг шаардаад байсан. Мароккогийн шүүх хохирогсдын ар гэрийн шаардлагыг ёсоор болгосон төдийгүй тэдэнд нөхөн төлбөр болгож 2 сая дирхам буюу ойролцоогоор 200 мянган долларын нөхөн төлбөр төлүүлэх шийдвэр гаргажээ.

Гэтэл гэмт этгээдүүдийн ар гэр нь ядуу тул хаанаасаа ингэж их мөнгө олж өгөх нь тодорхойгүй байна. Цаазаар авах ял авсан этгээдүүд нь хууль бус сүмийн номлогч 25 настай эрэгтэй, 27 настай мужаан, гэмт хэргийн видео бичлэгийг хийсэн 33 настай ажилгүй хүмүүс байж. Эднээс гадна тус гэмт хэрэгт тодорхой хэмжээгээр оролцсон бусад хэрэгтэнг 30 жил хүртэл хорих ял оноосон байна. Мөрдөн байцаах үеэр хэрэгтнүүдээс гэмт хэргийг үйлдсэн видео бичлэг илэрсэн нь шүүхэд гол нотлох баримт болжээ.