ТАЙРУУЛСАН ХӨЛӨӨ ТАМХИНААС ОЛЖ ХАРААД ТӨЛБӨР НЭХЖЭЭ

Францын Мец хотод амьдардаг 60 настай албани эр тамхины хайрцаг дээрх сэрэмжлүүлэг зурагнаас өөрийн тайрмал хөлийг олж хараад шүүхэд хандан зарга үүсгээд байгаа тухай "France Bleu" радиогийн сайт мэдээлсэн байна.

Зарга үүсгэсэн хижээл насны эрийн хүү нь Люксембургээс тамхи худалдан авснаар энэ дуулиан эхэлжээ. Тэрээр худалдан авсан тамхины хайрцаг дээрх "Тамхи таны артерийн судсыг бөглөнө" гэсэн анхааруулга бүхий тайрагдсан хөлийн зургийг хараад аавынх нь мөн гэж таньжээ. Учир нь, зөвхөн аавынх нь гэмтсэн хөлөнд байдаг түлэгдсэн сорви, өвөрмөц шарх тод харагдаж байжээ.

Энэ зургийг гэр бүлдээ үзүүлэхэд аав нь өөрийнх нь хөл байна гэж таньжээ. Гэтэл тэрээр эрэмдэг болсон хөлийнхөө зургийг тамхины хайрцаг дээр хэвлэх зөвшөөрөл огт өгөөгүй байж. Иймд тэрээр өмгөөлөгч хөлслөн нөхөн төлбөр шаардаж шүүхэд хандсан байна.

Өмгөөлөгч нь "Европын холбооны тамхины хайраг дээр хүний зургийг зөвшөөрөлгүй гаргана гэдэг байж боломжгүй зүйл. Тэгээд ч хөлөө тайруулах болсон шалтгаан нь тамхитай огт хамаагүй. Миний үйлчлүүлэгч амьдралдаа хэзээ ч тамхи татаж байгаагүй. Тэрээр 1997 онд Албанид байхдаа дайралтад өртөн гэмтсэн тул хөлөө тайруулсан. Өөрийнхөө тахир дутууг тамхины хайрцагнуудаас харна гэдэг тийм ч таатай зүйл биш шүү дээ" гэжээ.

Хөлгүй болсон эр Францад шилжин ирснийхээ дараагаар 2018 онд хиймэл хөл хийлгэхээр Мец хотын цэргийн эмнэлэгт хандсан юм байна. Тэр үеэр эмнэлэгт хэдэн зураг дарж байсан ч хариу өгөөгүй аж. Одоо өмгөөлөгч нь түүний үйлчлүүлэгчиийн зураг яаж яваад Мец хотын цэргийн эмнэлгээс алдагдан Европын комиссын мэдээллийн санд орсныг тодруулж байгаа. Европын холбоонд зарагдаж байгаа тамхины хайрцаг дээрх зургийг Европын комисс батлан шалгасны дараа хэвлэхийг зөвшөөрөл өгдөг журамтай.