УЙДСАН ХАТАН ХААН САРЬСАН БАГВААХАЙ БАРЬЖ ЗУГААЦЖЭЭ

Шотланд дахь Балморал цайзад зуны амарлтаа өнгөрөөж буй Их Британийн хатан хаан II Елизавета уйдахдаа сарьсан багваахай барьж зугаацсан тухай "The Sun" сонин мэдээлсэн байна.

Сарьсан багваахай нь Балморал цайзын шатны хонгилд үүрлээд олон жил болж байгаа аж. Тэднийг Шотландын хуулиар хамгаалдаг тул устгадаггүй. Цайзад амарч байгаа хатан хаан ихэд уйддаг тул бага ч гэлээ зугаацахын тулд бүжгийн танхимд бүх зарц нараа цуглуулж байгаад үүрлэсэн сарьсан багваахайнуудыг барьж эхэлдэг тухай "The Sun" сонины сэтгүүлч бичжээ. Харин сарьсан багваахайг барьсны дараа хатан хаан өөрийн гараар суллан тавиад, буцаж ирэх боломжоор хангахын тулд цайзын цонхыг нээлттэй орхихыг тушаадаг аж. Сэтгүүлч энэ тухайд "Балморалд уйдаж үхэхгүйн тулд хийдэг зүйлсийн нэг нь энэ. Зарц нарын хувьд сарьсан багваахайнууд огт байхгүй бол дээр. Гэхдээ Елизаветагийн хувьд сарьсан багваахай нь хурдан морь, корги нохойны дараагаар гуравт ордог дуртай амьтан нь хэдий ч энэ тухай хүмүүс тэр бүр мэдэхгүй л дээ" гэсэн байна.

Зургаадугаар сард II Елизавета хатан хааны Букинхэм ордон нь хархны дайралтад өртсөн тул тэрээр гэр бүлийн хамт түр орхин явахаас өөр аргагүй болсон тухай сонин хэвлэлүүд шуугиж байсан юм.