УТСАА ЦЭНЭГЛЭЖ БАЙГААД ЦАХИЛГААНД ЦОХИУЛАН НАС БАРЖЭЭ

Тайландын Чонбури мужид амьдардаг 21-н настай залуу ухаалаг утсаа орондоо цэнэглэн унтаж байгаад цахилгаанд цохиулан нас барсан хэрэг гарсан тухай "Daily Mail" сонин мэдээлсэн байна.

Арона Йотия гэгч залууг долоодугаар сарын 14-нд нас барсан байхыг нь гэрийнхэн нь олжээ. Гэр бүлийн оройн хоолонд ирэхгүй байсанд түгшсэн ах нь гэрт очиход хаалгаа онгойлгоогүй байна. Иймд цонхыг нь эвдэн ороход Арона нь орондоо утсаа цэнэглээд чихэндээ чихэвч хийсэн, нүүр ба гар нь түлэгдсэн шархтай, утас байрлаж байсан цавины орчим цус гарсан байдалтай нас барсан байж. Цагдаа нар дуудлагын дагуу ирээд үзлэг хийхэд цогцосноос хүч хэрэглэсэн гэх ямар нэг улс мөр илрүүлээгүй байна. Тиймээс унтаж байхад нь цэнэглээстэй утсанд богино холбоос үүссэний улмаас цахилгаан гүйдэлд цохиулан нас барсан гэсэн дүгнэлт хийсэн аж.

Үүнээс өмнө Тайландын Накхонратчасима мужид өөр нэгэн эрэгтэйг орондоо хэвтэх зуураа утсаа цэнэглэж байтал гэнэт богино холбоос үүсч аминд нь хүрсэн хэрэг бас гарч байсан аж.