​БРЮС ЛИ НЬ ХОНКОНГТ ӨРНӨЖ БАЙГАА ЭСЭРГҮҮЦЛИЙН ХӨДӨЛГӨӨНИЙ БЭЛЭГ ТЭМДЭГ БОЛОВ

Хонконгийн Коулун Тонг дүүрэгт байрладаг Брюс Лигийн амьдарч байсан байшингийн хувь тавилан нь хонконгчуудын хувьд хотод нь өрнөж байгаа үйл явдлын бэлэг тэмдэг болж хувираад байгаа тухай Испанийн "El Mundo" сонин бичиж байна.

Тулааны урлагын домогт мастерийн дүр нь Хонконгийг эх газрын Хятадаас эрс ялгаатайн бэлэг тэмдэг болсон байтал түүнийг байшинг шинэ эзэд нь нураагаад хонконгчуудын кантон аялагын гол өрсөлдөгч болох бээжин аялгын хэлний сургууль байгуулахаар зэхэж байгаа аж. Энэ бүхэн нь эх газрын Хятадад уусахаас уусахгүйн тулд янз бүрийн арга ашиглаж байгаа Хонконгийн өнөөгийн байдалтай тун төстэй харагдаж байгааг тус сонин онцолсон байна.

Брюс Лигийн амьдарч байсан "Тогоруун үүр" нэртэй байшингаас балгас л үлдээд байгаа. Гэвч 2008 онд эзэд нь зарах гэхэд Брюс Лигийн шүтэн бишрэгчид нь эсэргүүцлийн хөдөлгөөн өрнүүлээд заруулалгүй авч үлдэж чадсан. Домогт мастерийн шүтэн бишрэгчдийн клубын тэргүүн Во Ю-Көөнг нь "El Mundo" сонинд ярихдаа "Брюс Ли нь Хонконгийн сүнс сүлдийг шингээсэн хүн. Манай хот түүний байрыг хадгалахад анхаарахгүй байгаа нь туйлын харамсалтай" гэжээ. Ингэснээр Брюс Литэй холбоотой бүхнийг хадгалан үлдэх гэсэн чармайлт нь Бээжингээс шууд удирддаг бусад газраас ялгарах гэсэн нутгархаг үзлийн нэг хэсэг нь болж хувираад байгаа.

Ялангуяа хятад хэлний бээжин аялгын сургуулийг Брюс Лигийн байшингийн суурин дээр барих гэж байгааг маш олон хүн эсэргүүцэж байна. Эсэргүүцлийн жагсаалд оролцогч нэгэн хүн тус сонинд "Хятад хэлний сургууль уу? Санаатайгаар ийм сургуулийг энд байгуулах гээд байгаа эсэхийг мэдэхгүй ч эх газрын Хятад нь Хонконгийн өвөрмөц онцлог, улс төрийн автономи, манай соёлыг устгахын тулд алхам алхамаар бидэн рүү дайрахаа зогсоохгүй байна" гэжээ. Өөр нэгэн нь "Бид хятад хүмүүс биш харин хонгкончууд гэдэгт хамгийн гол нь байгаа юм. Соёлын, нийгмийн, улс төрийн гээд маш олон ялгаа бий. Үр хүүхдүүд маань Коммунист намын дарангуйлал дор амьдраасай гэж би хүсэхгүй байна" гэжээ.