ДЭЛХИЙ БАНК ПАКИСТАНЫГ 5,8 ТЭРБУМ ДОЛЛАР ТӨЛӨХ ЁСТОЙ ГЭЖ ШИЙДЖЭЭ

Дэлхийн банкны Хөрөнгө оруулалтын маргааныг шийдэх олон улсын төв нь Пакистан улсын Засгийн газрыг Чили Канадын хамтарсан "Thetyan Copper" компанид 5,8 тэрбум долларын нөхөн төлбөр төлөх ёстой гэж шийдсэн тухай Пакистаны "Dunya News" тв суваг мэдээлж байна.

"Thetyan Copper" компани нь 2011 онд Пакистан ба Иран, Пакистан ба Афганистаны хилийн ойролцоо байрладаг зэс ба алтны Реко Дик орд газарт олборлолт явуулахад 200 сая гаруй долларын хөрөнгө оруулалт хийсэн байдаг. Гэвч тухайн үеийн Пакистаны Засгийн газар нь хөрөнгө оруулалт хийгдсэний дараа гэнэт лиценз олгохоос татгалзсан.

Улмаар "Thetyan Copper" компани нь Дэлхийн банкны Хөрөнгө оруулалтын маргааныг шийдэх олон улсын төвд хандан зарга үүсгэхэд 2017 онд тус компанид нөхөн олговор төлөх ёстой гэсэн шийдвэр гаргасан. Гэхдээ тэр үед нөхөн төлбөрийн хэмжээг тодорхойлоогүй байгаад одоо ийнхүү нэгмөр баталаж байгаа аж.

"Thetyan Copper" компанийн захирлуудын зөвлөлийн тэргүүн Уильям Хейс нь төлөлтийн тал дээр Пакистаны Засгийн газартай тохиролцоо хийхэд бэлэн гэсэн байна. Харин Пакистаны Засгийн газрын төлөөлөгчид нь Олон улсын төвийн шийдвэрийг нэн даруй давж заалдана гэжээ.