АМЕРИКТ ХУУЛЬ БУС ЦАГААЧДЫГ БАРИВЧИЛЖ ЭХЭЛЛЭЭ

АНУ-ын зарим хотуудад хууль бус цагаачдыг албадан нутаг буцах зорилгоор олноор нь хоморголон баривчилж эхэлсэн тухай "Fox News" мэдээлсэн байна.

Бямба гарагаас ням руу шилжих шөнө Нью-Йорк болон бусад том хотуудад баривчилгаа эхэлж. Гэхдээ Цагаачлал ба гаалийн хяналтын холбооны албаны тэргүн Мэттью Олбэнс нь хоморголон баривчлах тухай ярих нь зохисгүй гээд "Бид цагаачлалын хэргээр шүүхээр орж, шүүхээс улсыг орхин явах тухай заалт хүлээн авсан тодорхой хүмүүсийн эсрэг албадлагын арга хэмжээ явуулж байна. Цагаачлалын хэрэг хариуцсан шүүгчийн хууль ёсны шийдвэрийг очиж хэрэгжүүлэхээс өөр сонголт бидэнд алга" гэж мэдэгджээ.

Ерөнхийлөгч Трамп нь ням гарагт өөрийн Twitter хуудсан дээрээ Америкийн хилийн дагуух цагаачдыг түр байршуулах төвүүдэд гэмт хэрэгтнүүд олноор байгааг онцлоод "Уучлаарай, би тэднийг улс руугаа оруулж чадахгүй" гэж жиргэжээ. Цагаачлалын албаныхан эхний ээлжинд Америкийн 10 том хотод ажиллагаа явуулан багаар бодож 2000 хууль бус цагаачийг баривчлахаар төлөвлөөд байгаа юм байна.

Америкийн хууль сахиулах албад тун удахгүй хууль бус хэдэн сая цагаачдыг албадан нутаг буцааж эхлэх тухай Трамп зургаадугаар сарын сүүлээр анхааруулж байсан билээ. Трамп нь 2016 онд сонгуулийн кампанит ажлын үеэр хууль бус цагаачлалын эсрэг илүү хатуу бодлого явуулж, хилийн хяналтаа чангатгахаар амлаж байсан юм. Тэрээр Америкт амьдарч байгаа 11 сая орчим хууль бус цагаачдын дийлэнхийг гэмт хэрэгтэн гэж үздэг.