​ДУБАЙД ГАДААДЫН ЖУУЛЧДАД АРХИ УУХЫГ ЗӨВШӨӨРЛӨӨ

Дубайн эрх баригчид гадаадын жуулчдад зориулан согтууруулах ундаа хэрэглэх 30 хоногийн үнэгүй зөвшөөрөл олгож байхаар болсон тухай "Интерфакс" мэдээлэв.

Тусгай зөвшөөрлийг 21-ээс дээш настай, лалын шашин шүтдэггүй жуулчдад өгнө. Зөвшөөрөл авсан хүмүүс нь хууль зөрчлөө шийтгүүлнэ гэж эмээлгүйгээр Арабын Нэгдсэн Эмират улсын нутаг дэвсгэр дээр согтууруулах ундааг заагдсан журмын дагуу хэрэглэж болохоор болов. Зөвшөөрөл авахын тулд гадаадын жуулчин нь согтууруулах ундаа зардаг дэлгүүрт очиж тусгай мэдэгдэл бөглөөд гарын үсэг зурж, паспорт ба визний хуулбараа үлдээх ёстой.

Тусгай зөвшөөрлийг Дубайд согтууруулах ундаа уух журмыг танилцуулсан гарын авлагатай хамт өгнө. Тус журмын дагуу согтууруулах ундааг олон нийтийн газарт хэрэглэх хориотой, согтуугаар жолоо барих, олон нийтийн амгалан тайвныг алдагдуулах хориотой.

Үүнээс өмнө Арабын Нэгдсэн Эмиратуудад хоёр жил байнга оршин суух виз авсан гадаадын жуулчдад л согтууруулах ундаа худалдан авах, гэртээ хадгалж, хэрэглэхийг зөвшөөрдөг байсан юм. Үүнээс болоод Дубайд цөөн хоногоор ирсэн гадаадын жуулчид согтууруулах ундаа хориглох хуулийг зөрчин шийтгэл авах тохиолдол олон гарч байсан нь тус улсыг зорих аялал жуучлалд сөргөөр нөлөөлж магадгүй гэж үзээд ийм шийдвэр гаргажээ.

Арабын Нэгдсэн Эмиратууд нь лалын шашинт улс тул согтууруулах ундаа хэрэглэхийг хуулиар хориглодог. Зөвшөөрөлгүй архи худалдан авбал 500 доллараар торгож, хэрэглэсэн тохиолдолд 30 хоног хүртэл хорьдог.