​ЗӨВЛӨЛТИЙН ЦӨМИЙН ТОРПЕД БҮХИЙ ЖИВСЭН ШУМБАГЧИЙН ИХ БИЕД ЭВДРЭЛ ГАРЧЭЭ

Норвегийн тэнгист живсэн Зөвлөлтийн К-278 "Комсомолец" цөмийн шумбагч онгоцны их бие гэмтсэн тухай Норвегийн "The Barents Observer" сонин мэдээлж байна. Тус сонинд бичихдээ "Алсын удирдлагатай шумбагч төхөөрөмжөөр авсан зураг дээр шумбагч онгоцны урд хэсэг ихээхэн гэмтэлтэй байгаа нь харагдаж байна. Цөмийн цэнэгт хошуу бүхий торпедууд нь яг энэ хэсэгт хадгалагдаж байсан" гэжээ.

Цөмийн торпедийн цэнэгт хошуунд ашигласан плутоний -239 элементийн хагас задралын үе нь 24 мянган жил тул аяндаа аюулгүй болно гэж найдалтгүй. Гэтэл цөмийн цэнэгт хошуу хийсэн плутони нь шумбагчийн их биеийг хийсэн титантай урвалд орон элэгдэлд орж магадгүй гэж болгоомжилж байгаа аж.

Оросын цэргийн шинжээчид нь Норвегийн талыг Зөвлөлтийн цөмийн зэвсгийн нууцыг олж мэдэх гэхдээ шумбагчийн их биеийг гэмтээснээс ийнхүү Норвегийн тэнгисийн ус цацраг идэвхт бодисонд хордох аюул нүүрлэсэн байж болзошгүй тухай мэдэгждээ. Одоогоор живсэн шумбагчийн эргэн тойрон дахь цацраг идэвхийн хэмжээ нь зөвшөөрөгдсөн түвшинээс 800 мянга дахин өндөр байгаа тухай мэдээлж байна. Гэвч шумбагч нь загас, ургамал үгүй их гүнд живсэн тул загасчлал, аялалд аюулгүй гэж үзэж байгаа аж.

Зөвлөлтийн К-278 "Комсомолец" шумбагч нь 1989 оны дөрөвдүгээр сарын 7-нд Норвеги тэнгист 1680 метрийн гүнд живсэн байдаг. Осол гарах үеэр шумбагч дээр алба хааж байсан багийн 69 гишүүнээс 42 нь амиа алдсан. Шумбагчийн долоодугаар хэсэгт түймэр гарсны улмаас сүйрэл болж живжээ. Энэхүү шумбагч нь тухайн үедээ хамгийн шинэд тооцогдож байсан бөгөөд 1027 метрийн гүнд шумбан дэлхийн дээд амжилт тогтоож байсан юм. К-278 "Комсомолец" нь цөмийн хүчээр ажилладаг нэг хөдөлгүүртэй, цөмийн цэнэгт хошуу бүхий хоёр торпедоор зэвсэглэсэн байж.