КИБЕР ҮЗЭН ЯДАЛТЫН ЭСРЭГ ХУУЛЬ БАТАЛНА

Францын парламент нь кибер үзэн ядалтын эсрэг хууль батлах гэж байна. Хэрэв энэ хуулийг парламентын доод танхим батлавал энэ есдүгээр сард дээд танхим болох Сенат баталгаажуулснаар хүчин төгөлдөр болох юм.

Энэхүү хуулийн дагуу олон нийтийн сүлжээ, интернэт форум, хайлтын системүүд нь түрэмгийлсэн, заналхийлсэн утга бүхий сэтгэгдлүүдийг 24 цагийн дотор устгаж байх ёстой болно. Устгаагүй тохиолдолд олон зуун мянган еврогоор торгох аж. Түрэмгий, заналхийлсэн утгатай сэтгэгдэл байгаа тухай дурын хэрэглэгч гомдол мэдүүлэх боломжтой болно.

Мөн интернет сүлжээнд нэрээ нууцлах явдлыг арилгах арга хэмжээ авахаар болж байгаа аж. Францын Ерөнхийлөгч Макрон нь энэ тухай мэдэгдэж байсан. Франц нь энэ хуулийг Германд батлаг үйлчилж байгаа хуулийн жишгээр санаачилсан байна.

Германд интернет сүлжээн дэх үзэн ядалт, доромжлолын эсрэг хууль 2017 оноос эхлэн мөрдөгдөж байгаа. Энэ хуулийн дагуу онлайн үйлчилгээ явуулдаг компаниуд нь үзэн ядалтыг дэвэргэсэн байж болзошгүй сэтгэгдлүүдийг 24 цагийн дотор устгаж байх ёстой.