​ПАКИСТАНД ДОХ-ЫН ТАХАЛ ДЭГДЭЭД БАЙНА

Пакистаны өмнөд нутагт ДОХ-ын тахал дэгдсэний уршгаар 700 гаруй хүүхэд аюулт өвчний халдвар авсан тухай "The Telegraph" мэдээлжээ. Тус улсын Синд мужийн Ларкан хотын орчимд ДОХ-ын халдвар тэсрэлтийн хэлбэрээр тархаж байгааг өнгөрсөн дөрөвдүгээр сард илрүүлжээ. Нэгэн эмнэлгийн ажилтан нь цөөнгүй тооны эмчлүүлэгч хүүхдийн халуун ердийн эмэнд буухгүй, эмчилгээний үр дүн тааруу байгааг ажиглаад бүгдийг нь шинжилгээнд хамруулж. Ингэхэд тус эмнэлэгт хэвтэж эмчлүүлсэн хүүхдүүд бүгд ДОХ-ын вирусээр халдварлагдсан нь тогтоогджээ.

Энэ тохиолдлын дараагаар Дэлхийн эрүүл мэндийн байгууллага орон нутгийн хүмүүсийг олноор нь шинжилгээнд хамруулсан. Ингээд 30 мянган хүнээс шинжилгээ авахад ДОХ-ын 876 тохиолдол илэрсэн. Халдвартай хүмүүсийн 82 хувь нь 15 нас хүрээгүй хүүхдүүд.

Аюулт өвчний вирусийг албан ёсны зөвшөөрөлгүй эмчилгээ явуулдаг луйварчид тарааж байна гэсэн дүгнэлтийг Пакистаны эрх баригчид хийсэн байна. Харамсалтай нь орон нутгийн ядуу иргэд ийм хуурамч эмнэлэг, эмчлэх эрхгүй "эмч"нараар үйлчлүүлэхээс өөр сонголтгүй байх нь түгээмэл, тэдгээрт нь ариун цэврийн наад захын хэм хэмжээг мөрддөггүй нь өвчин тархахад нөлөөлсөн бололтой. Үүнтэй холбоотойгоор халдварт өвчин судлаачид ДОХ-ын тахлын бодит цар хүрээг тогтоохын тулд илүү нарийн үзлэг, шинжилгээ явуулахаар төлөвлөсөн аж.

Пакистанд ДОХ-ын энэ мэт тархалт урд нь ажиглагдаж байсан. Тухайлбал, Ларканд 2003 онд мансууруулах бодис тарьж хэрэглэдэг хүмүүсийн дунд ДОХ тахал хэлбэрээр дэгдэж байв. 2016 онд хүүхдийн эмнэлгийн эмч нарын хариуцлагагүйгээс 12 хүүхэд халдвар авч байсан бол хиймэл бөөрний аппарат ашиглахдаа ариутгал хийгээгүйн улмаас 206 өвчтөн ДОХ-ынг халдвар авсан хэрэг гарсан. Харин 2019 оны гуравдугаар сард тариурыг ариутгалгүй ашигласны гайгаар 400 гаруй хүн ДОХ-ын халдвар авсан хэрэг гарч байжээ.