​ХОНКОНГИЙН ЖАГСАГЧИД ТАРЬСАН ХОГОО ЦЭВЭРЛЭЖ БАЙНА

Эх газрын Хятадын бодлогыг эсэргүүцэн жагссан хонконгчууд жагсаал, цуглааны дараа үлдээсэн хогоо өөрсдөө цэвэрлэж эхэлжээ. Долоодугаар сарын 1-нд болсон жагсаалын үеэр эсэргүүцэгчид нь Хонконгийн парламентын ордныг дайран эзэлж, нэлээд эвдрэл сүйтгэл болсон. Улмаар дэлхийн нийт энэхүү үйл явдлыг тойрсон Бээжин, Вашингтон, Лондоны харилцан зэмлэлд анхаараад бусад асуудлыг тоогоогүй. Гэтэл жагсаалд оролцогчдын хамгийн ухамсартай хэсэг цуглаан болсон газар эргэн ирж өөрсдийн тарьсан хог, хаягдлаас гудамж талбайг цэвэрлэж эхэлжээ.

Хог цэвэрлэх ажилд оролцсон жагсагчид нь "Нэгэнт л бид хог тарьж чадсан юм бол цэвэрлэж бас чаддаг байх хэрэгтэй", "Бид байгаль орчинд анхаарал тавьж байх ёстой, ийм том эсэргүүцлийн арга хэмжээний дараа ямагт их хог үлддэг" гэсэн тайлбар өгчээ.

Эсэргүүцлийн жагсаалыг зохион байгуулагчид ба оролцогчид нь Хонконгийг эх газрын Хятадаас улс төрийн тогтолцооны хувьд тусгаар төдийгүй, иргэд нь нийгмийн өмнө хүлээсэн үүргээ гүнээ ухамсарладаг гэдгээрээ эрс ялгаатай гэдгийг харуулахыг ямагт хичээсээр ирсэн. Жагсаалын үеэр түргэн тусламжийн тэргийг дундуураа гаргаж байгаа зэрэг үйлдэл нь ийм ялгаа байдаг гэдэгт итгэхэд хүргэж байсан. Энэхүү арга хэмжээ ч мөн л энэ эрс ялгааг харуулах зорилготой гэж үзэж байна.