​ПУТИН РОМЫН ПАПТАЙ УУЛЗАВ

ОХУ-ын Ерөнхийлөгч В.Путин дэлхийн католик шашинтнуудын тэргүүн Ромын Паптай уулзсан тухай "ТАСС" мэдээлж байна. Уулзалт нь Папын ордоны номын санд болж талууд шашны болон олон улсын хурцадмал асуудлуудын талаар ярилцжээ. Уулзалтын дараагаар талууд хамтарсан мэдэгдэл гаргаж бөгөөд түүнд "Ярилцах явцад Ромын католик сүмийн ОХУ дахь үйл ажиллагаатай холбоотой чухал асуудлууд болон Сири, Венесуэл, Украйн нөхцөл байдал зэрэг дэлхийн улс төрийн хурц сэдвүүдийг хөндлөө" гэж дурджээ.

Путин нь Франциск Папаас гадна Ватикан хот улсын төрийн нарийн бичгийн дарга (Засгийн газрын тэргүүн) Пьетро Паролин хамбатан, улс орнуудтай явуулах харилцааны нарийн бичгийн дарга (Ватиканы ГХЯ-ын сайд) Пол Ричард Галлахер зэрэг хүмүүстэй уулзсан байна.

Ватикан нь дэлхийн хамгийн жижигбуюу 0,44 дөрвөлжин километр газар нутагтай, ойролцоогоор 1000 хүн ам оршин суудаг хот улс. Гэсэн хэдий ч Ватикан нь дэлхийн католикуудын тэргүүн Ромын Пап ламын өргөө гэдгээрээ дэлхийн хамгийн нөлөө бүхий хотуудын нэг. Учир нь, Христийн шашны католик урсгалыг дагагч 1,2 тэрбум хүний хувьд Папын үг, үйлдэл, айлдвар болгон заавал дагаж мөрдөх ёстой хууль байдаг. Иймд өрнөдийн зарим сонин хэвлэл нь Путин Ромын Паптай ийм найрсаг байдлаар уулзаж, нааштай хамтарсан мэдэгдэл хийнэ гэдэг нь Оросыг Европын парламентын ассамблейд эрхээ сэргээлгэсэнтэй адил том ялалт гэж бичсэн байна.