ХОНКОНГИЙН ЖАГСАГЧДААС БОЛЖ ХЯТАД БРИТАНИЙ ХАРИЛЦАА МУУДАВ

Хонконгийн цагдаа нар олон нийтийг хамарсан үймээнтэй холбоотойгоор 12 хүнийг баривчилсан тухай "Associated Press" агентлаг мэдээллээ. Баривчлагдсан хүмүүсийн заримд нь галт зэвсэг хууль бусаар хадгалсан, цагдаагийн ажилтнууд руу дайрсан хэргээр ял тулгааад байгаа аж. Эдгээр хүмүүсийг долоодугаар сарын 1-ний жагсаалд оролцох үеэр, гэхдээ жагсагчдыг парламентын ордон руу дайрахаас өмнө баривчилсан юм байна.

Хятадын эрх баригчид хонконг жагсагчдыг баривчилж байгаад Их Британий Гадаад харилцааны сайд Жереми Хант дургүйцлээ илэрхийлэн БНХАУ нь 1997 онд Хонконгийн эргүүлж авахдаа "нэг улс хоёр систем" гэсэн зарчмыг мөрдөхөөр амалсныг нь сануулсан. Гэтэл үүний хариуд Их Британи дахь БНХАУ-ын Элчин сайд Лю Сяомин Лондон хотноо хэвлэлийн бага хурал зарлаж,Английн сэтгүүлчдийн өмнө "Хонконг бол Хятадын засаг захиргааны онцгой дүүрэг. Британийн колончлолын үеийнх шигээ байхаа больсон. Хонконгд болж байгаа зүйлс зөвхөн Хятадын дотоод хэрэг, түүнд гадаадын аливаа нэг улс эсвэл байгууллага эсвэл хувь хүмүүсийн зүгээс оролцох нь байж болшгүй хэрэг. Бид ийм оролцоог хамгийн хатуу үгээр шүүмжлэн эсэргүүцэж байна. Ингэж оролцогчид нь өөрсдийн үг яриа ба үйлдлийн үр дагаварын талаар тун нухацтай бодох ёстой" гэсэн байна. Ийм мэдэгдэл хийснээр Хятадын Элчин сайд нь тун удахгүй Их Британийн Ерөнхий сайд болж тун магадгүй байгаа хүнийг амаа мэдээрэй гэж загнасан хэрэг болсон. Учир нь, Жереми Хант нь Их Британийн Ерөнхий сайд болох хамгийн өндөр магадлалтай хоёр хүний гэгдэж байгаа.

Үүнээс болоод ч тэрүү Их Британийн Гадаад харилцааны яамнаас Хятадын Элчин сайдыг дуудан түүний хийсэн мэдэгдэл нь зүйд үл нийцэх, хүлээн авах боломжгүй зүйл гэдгийг хатуу анхааруулсан байна.

Байдал ийм болсонд Британийн Ерөнхий сайд болох магадлал хамгийн өндөр гэгдэж байгаа өөр нэг улстөрч дуугүй өнгөрөх боломжгүй байсан бололтой. Гадаад харилцааны сайд асан Борис Жонсон "Бээжингийн бодлогыг эсэргүүцэж байгаа Хонконгийн ард түмнийг дэмжиж байна. Бээжин дэх найз нартаа "нэг улс хоёр систем" гэдэг зарчим ажиллаж байсан, ажиллаж байгаа ба цаашид зөрчигдөх ёсгүй гэдгийг сануулахыг хүсч байна" гэжээ.

Ингэснээр Хятадын Элчин сайд нь Британийн Ерөнхий сайд болох магадлал хамгийн өндөр гэгдэж байгаа хоёр хоёр улстөрчтэй зөрчилдсөн нь ирээдүйд ямаршуу үр дүнд хүргэхийг таашгүй.