КАНАДЫН ХАЯГДАЛ АЧСАН КОНТЕЙНЕРҮҮДИЙГ БУЦААН ХҮРГЭЛЭЭ

Канадаас гаралтай хог хаягдал бүхий 69 контейнер ачсан усан онгоц Канад улсын Британий Колумб мужийн Tsawwassen боомтод өнөөдөр өглөө зангуугаа хаясан тухай тус улсын төв ТВ мэдээлжээ. Канад нь Филиппинтэй хийсэн тохиролцооны дагуу энэ хаягдлыг дахин боловсруулалтад оруулахаар зургаан жилийн өмнө буюу 2013 онд тийш нь явуулж байжээ. Гэтэл тохиролцооны дагуу хуванцар хаягдал хийх ёстой байсан контейнерт ашигласан живх, гал тогооны хаягдал гэх мэт жирийн ахуйн хог хаягдал байсан нь илрэхэд Канад Филиппиний хооронд дипломат хямрал үүссэн юм.

Контейнерээс ахуйн ердийн хог илэрсэн гэдгийг Филиппиний Ерөнхийлөгч Дутертэ мэдсэн даруйдаа канадчуудыг хог хаягдлаа тавдугаар сарын 15-н гэхэд буцааж авахыг шаардсан юм. Тэрээр "Ёс төртэйгээр угтаж авахдаа бэлдэцгээ. Хүсвэл идсэн ч болно" гэсэн. Гэвч Канадын тал тодорхой хариу өгөхгүй байсанд Дутертэ нь Оттава дахь Элчин сайд, бусад хотууд дахь Ерөнхий консулуудаа эгүүлэн татсанаар асуудал олон улсын анхаарлыг ихэд татсан юм. Ингээд канадчууд арга буюу хаягдлаа нутаг руугаа буцаахаар болсон нь энэ аж.

Филиппин зоримог алхам хийж Канад руу хаягдлыг буцаасны дараагаар Малайз, Индонези зэрэг улсууд улсаас дахин боловсруулна гэж авсан хаягдлыгнь мөн адил буцаан явуулах хүсэлтээ илэрхийлээд байгаа юм.