ТРАМП КИМ ХОЁР АХИН УУЛЗАВ

Өнгөрсөн ням гарагт АНУ ба БНАСАУ-ын тэргүүнүүд Солонгосыг хоёр хуваадаг 38 дугаар өргөргийн дагуух зэвсэггүй бүсд уулзсан явдал дэлхийн нийтийн анхаарлыг ихэд татлаа. Хоёр улсын тэргүүнүүд харилцан мэндлэлцсэний дараагаар Трамп зааглагч шугамыг даван алхаж Хойд Солонгосын нутагт хөл тавьсан байна. Ингэснээр Трамп нь Хойд Солонгост айлчилсан Америкийн анхны Ерөнхийлөгч болов. Ким Жон Ун нь Трамптай дахин уулзаж байгаадаа баяртай байна гээд ийм газар уулзана гэж ер бодож байгаагүй гэдгээ хэлж. Дараа нь тэр хоёр Өмнөд Солонгосын нутагт руу орж яриа өрнүүлжээ. Ким Жон Ун нь Трампыг Хойд Солонгосын нутагт хөл тавьсан явдлыг зоригтой бөгөөд шийдэмгий алхам гэж нэрлэжээ. Трамп хариу талархаад тэднийг агуу их нөхөрлөл холбож байна гэсэн аж.

Уулзалт цаг гаруй үргэлжилсэн бөгөөд уулзалтын өрөөнд АНУ-ын Төрийн нарийн бичгийн дарга Майкл Помпео, Сангийн сайд Стивен Мнучи нар байлцжээ.

Ингэснээр Ким ба Трамп нар гурав дахь удаагаа уулзаад байгаа юм. Өмнөд Солонгосын улстөрчид энэхүү уулзалтын ач холбогдлыг өндрөөр үнэлжээ. Тухайлбал, Солонгосын Эрх чөлөөний намын тэргүүн Хван Гё Ан нь "АНУ ба БНАСАУ-ын дээд хэмжээний харилцан яриа нь анх удаагаа зэвсэггүй бүсд боллоо. Уулзалтыг энд хийнэ гэдэг нь бэлэгдлийн чухал ач холбогдолтой юм. Ялангуяа Трамп нь Солонгосын хойгийн цөмийн зэвсгийн асуудлыг бүхэлд нь эцэслэн шийдэх тухай ярьсан нь чухал. Энэ удаагийн уулзалт БНАСАУ-ыг цөмийн зэвсгээс ангижрах эхлэл байгаасай гэж хүсч байна" гэжээ.

Хачирхалтай нь Дональд Трамп Өмнөд Солонгос дахь Америкийн цэргийн баазаар орж албан хаагчдынхаа өмнө үг хэлэхдээ цөмийн зэвсгийнхээ чадлаар сайрхсан гэнэ. Тэрээр "Бид цөмийн зэвсгээ бүрэн сайжруулж, зарим тохиолдолд цоо шинийг хүлээн авч байгаа. Бид тэдгээрийг хэрэглэхийг хүзээ ч хүсэхгүй ч манай зэвсэг дэлхийн шилдэг нь бас манайх хамгийн их цөмийн зэвсэгтэй" гэжээ.