ФРАНЦЫН ТЭРБУМТНУУД ХАМГИЙН ХУРДАЦТАЙ БАЯЖИЖ БАЙНА

Францын хамгийн баянд тооцогддог хүмүүс 2019 оны эхний зургаан сарын дотор нийт хөрөнгийн хэмжээгээ 78 тэрбум доллараар өсгөсөн тухай "Bloomberg" агентлаг мэдээлж байнаа.

"Bloomberg Billionaires Index"-т орсон 14 тэрбумтан нийт хөрөнгөө 35 хувиар өсгөөд амжижээ. Ингэснээр франц тэрбумтнууд нь Хятадын тэрбумтнуудаас 17 хувиар, америк тэрбумтнуудаас 15 хувиар хурдан баяжсан байна. Тухайлбал, "Louis Vuitton", "Moët", "Hennessy" зэрэг тансаг зэрэглэлийн брэндүүдийг эзэмшдэг "LVMH"-ийн эзэн Бернар Арно нь хагас жилийн дотор 34 тэрбум долларын орлого олсон. Францын болон дэлхийн хамгийн баян эмэгтэй гэгддэг Франсуаза Бетанкур Мейерс нь 10,7 тэрбумаар баяжсан. Харин "Kering" компанийг үүсгэн байгуулагч Франсуа Пино нь 2019 он гарснаас хойш хөрөнгөө 8,21 тэрбум доллараар нэмэгдүүлж чаджээ.

Баялагийнхаа өсөлтийн хурдаар францчуудад дөхсөн нь Тайландын тэрбумтнууд бөгөөд тэд нийт хөрөнгөө 33 хувиар өсгөсөн бол сингапур ба япон тэрбумтнууд тус бүр 24 хувиар хөрөнгөө өсгөсөн байна.

Гэхдээ 2019 онд хөрөнгөө хамгийн ихээр буюу 60 хувиар өсгөсөн тэрбумтан нь Нигерийн Алике Дангонте болж. Тэрээр 2019 онд сүйхээтэй ажилласнаар хөрөнгөө 16,8 тэрбум доллар болгож чадсан аж.