ХОНКОНГИЙН ЭСЭРГҮҮЦЛИЙН ЖАГСААЛААС БОЛЖ АНГЛИ, АНУ-УУД ХЯТАДАД САНУУЛГА ӨГЧ БАЙНА

Хонконг дахь гэмт хэргийн сэжигтнүүдийг эх газрын Хятад руу шилжүүлэх хуулийг эсэргүүцсэн жагсаал цуглаан тасрахгүй үргэлжилсээр. Хонконгийг Их Британий мэдлээс БНХАУ-ын мэдэлд шилжсэн ээлжит ойн ёслолын үеэр эсэргүүцлийн жагсаал онцгой ширүүн болж, жагсагчид БНХАУ-ын Төрийн далбааг мандуулах ёслолыг хийлгээгүйгээр барахгүй Хонконгийн парламентын ордоныг дайран эзэлжээ. Мөргөлдөөний үеэр олон арван жагсагчид гэмтсэн байна.

Үүнтэй холбогдуулан Их Британий Гадаад харилцааны сайд Жереми Хант нь БНХАУ-ыг "нэг улс хоёр систем" гэсэн зарчмыг дагаж мөрдөнө гэсэн үүрэг хүлээсэн гэдгийг сануулав. Мөн Монголд айлчилсан Трампын зөвлөх Жон Болтон "Хятад нь бусад улсуудын адил олон улсын өмнө үүрэг амлалтуудаа биелүүлж байх ёстой" гэж сануулаад авсан байна.

Эдгээр сануулгын хариуд БНХАУ-ын Гадаад харилцааны яам хэвлэлийн бага хурал хийж, албан ёсны төлөөлөгч Гэн Шуан нь "Хонконгийн хэрэг бол Хятадын дотоод хэрэг, гадаадын ямар ч улс гүрэн түүнд хөндлөнгөөс оролцох эрхгүй" гэж мэдэгджээ.

Мөн Тайвань арлын Засгийн газрын тэргүүн Цай Инвэнийг Карибын тэнгисийн орнуудаар айлчлах явцад АНУ-ын нутгаар дамжин өнгөрөх виз олгох гэж байгаад албан ёсоор эсэргүүцэл илэрхийлсэн байна. Гэн Шуан нь "Хятад улс нь Тайвань ба АНУ-ын хооронд албан ёсны уулзалт явагдахыг ямагт эсэргүүцсээр ирсэн. Энэ байр суурь нь хөдлөшгүй бөгөөд ойлгомжтой юм. Бид нэгдмэл Хятад улс ба хамтарсан гурван мэдэгдлийн зарчмыг дагах, Цай Инвэньд дамжин өнгөрөх визийн зөвшөөрөл өгөхгүй байхын АНУ-д уриалж байнаг" гэжээ.