​КОНГО УЛСААС ӨДӨРТ 300 ХҮН ДҮРВЭЖ БАЙНА

Энэ сард Бүгд найрамдах Конго улсын 7500 гаруй иргэн яс үндсээр ялгасан хүчирхийллээс дайжин хил залгаа Уганда руу дүрвэн зугтсан тухай НҮБ-ын Дүрвэгсдийн хэрэг эрхлэх агентлаг UNHCR мэдээлсэн байна. Конго улсад үхлийн аюултай Эбола тахлын өвчлөл бүртгэгдсэн тул Угандын эмч нар дүрвэгсдэд нарийвчилсан үзлэг хийж байгаа аж.Конгоос хоногт 300 орчим хүн Уганда руу дүрвэн орж ирж байгаа нь тавдугаар сарынхаас хоёр дахин олон байгаа тухай UNHCR мэдэгджээ. Дүрвэгсдийн дийлэнх нь хэма ба ленду үндэстнүүдийн хооронд зэвсэгт мөргөлдөөн гараад байгаа Итури мужаас гаралтай бөгөөд Альберт нуураар дамжин ирж байгаа аж.

UNHCR төлөөлөгч А.Махечич энэ талаар "Зэвсэглэсэн хүмүүс тосгон руу нь дайрч, гэр орныг нь дээрэмдэн галдаж, эрэгтэй, эмэгтэй, хүүхэд бүгдийг алж байгаа тухай дүрвэгчид ярьж байна. Зарим нь ойрын хугацаанд гэртээ харьж чадахгүй гэсэндээ эд зүйлсийнхээ ихэнхийг үүрээд явж байна. Зарим нь болохоор зөвхөн солих хувцастайгаа орж ирж байна. Нийт дүрвэгсдийн гуравны хоёр нь хүүхдүүд" гэжээ.Угандад өдөр болгон олон зуун дүрвэгч ирж байгаагаас тус улсын дамжин дүрвэгсдийг өнгөрүүлэх ба түр орогнуулах байгууламжууд дүүрсэн. Үүнээс болоод хүмүүнлэгийн байгууллагууд хөрөнгө мөнгөний дутагдалд орж, шаардлагатай тусламжийг тэр бүр үзүүлж чадахгүйд хүрчээ. НҮБ-аас Уганда дахь дүрвэгсдэд зориулан 150 сая доллар хэрэгтэй байна гэснээс 17 хувийг нь л олон улсын хамтын нийгэмлэгээс даагаад байгаа аж.