Улсын Их Хурлын гишүүн, Монгол-Болгарын парламентын бүлгийн дарга Л.Энхболд өнөөдөр /2019.06.26/ Болгар улсын Эдийн засгийн сайд ЭмилКараниколов тэргүүтэй төлөөлөгчидтэй уулзлаа.
Уулзалтад Монголын талаас Улсын Их Хурлын гишүүн, Монгол-Болгарын парламентын бүлгийн гишүүн Х.Нямбаатар байлцлаа.Уулзалтын эхэнд Монгол-Болгарын парламентын бүлгийн дарга Л.Энхболд төлөөлөгчдийг Монгол оронд тавтай зочлохыг хүсээд, Монгол Улс нь Европын Холбоо, түүний гишүүн орнуудтай найрсаг харилцаа, хамтын ажиллагаагаа өргөжүүлэхэд чухал ач холбогдол өгдгийг тэмдэглэв.
Хариуд нь ноён Эмил Караниколов, Болгар Улсын Үндэсний ассамблей /парламент/-аас Монгол Улсын Их Хуралтай уулзалт зохион байгуулах, хамтын ажиллагааны талаар ярилцах итгэмжлэл, чиглэлийг өөрт нь үзүүлсний дагуу уулзалтад ирснийг тэмдэглээд төлөөлөгчдийн бүрэлдэхүүнд Үндэсний ассамблейн гурван гишүүн багтсаныг танилцуулав.
Үүний дараа Монгол-Болгарын парламентын бүлгийн дарга Л.Энхболд хоёр орны хамтын ажиллагааны талаар тэмдэглэн хэлэхдээ 1965-1985 онд Болгараас 28.2 сая шилжих рублийн зээл авч, Чойбалсан хотод мах комбинат, Дархан хотод нэхий эдлэлийн үйлдвэр, Улаанбаатар хотод гахай бордох завод, хүнсний ногооны хүлэмж, Орхон-Шарын голын жимс, ногооны аж ахуй, Өвөрхангайн Өвдөг худаг, Алтайн тоосгоны үйлдвэр зэргийг барьж байгуулсан нь Монгол улсад том бүтээн байгуулалт болсныг онцлоод хоёр орны хууль тогтоох байгууллага хоорондын хамтын ажиллагааг хөгжүүлэх нь эргээд хоёр талын харилцаанд чухал суурь, дэмжлэг болох учир парламент, түүний Тамгын газар хооронд шууд холбоо тогтоох, харилцааг бэхжүүлэх талаар ажиллахаа илэрхийллээ.
Энэхүү уулзалтаар хоёр улсын худалдааны эргэлтийг нэмэгдүүлэх, бизнес эрхлэгчдийн хамтын ажиллагааг идэвхжүүлэх талаар санал солилцсон. Энэ ярианы үеэр Болгар улсын Эдийн засгийн сайд Эмил Караниколов Монголын бараа бүтээгдэхүүнийг Европын зах зээлд гаргахад Болгар улс ямагт дэмжиж, гүүр болж ажиллана хэмээн онцлон тэмдэглэв.
Улсын Их Хурлын гишүүн, Монгол-Болгарын парламентын бүлгийн гишүүн Х.Нямбаатар мөн санал бодлоо илэрхийллээ.
Тэрбээр, Болгарт урлагийн боловсрол, мэргэжил эзэмшиж ирсэн урлаг соёлын хүмүүс Монголдоо өндөр амжилтад хүрсэн байдгийг тэмдэглээд, цаашид оюутан залуусыг урлаг соёлын чиглэлээр сургахад хамтран ажиллах, дэмжих хүсэлт гаргасныг ноён Эмил Караниколов талархан хүлээж авлаа.
Болгар улсын Эдийн засгийн сайд Эмил Караниколов тэргүүтэй төлөөлөгчид манай улсад Засгийн газар хоорондын комиссын зургаадугаар хуралдаанд оролцож байгаа юм гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.
Улаанбаатар °C 
Сэтгэгдэл (0)
Сэтгэгдэл бичигдээгүй байна