КОНСУЛ Д.МӨНХ-ЭРДЭНИЙГ ЭРГҮҮЛЭН ТАТАХЫГ МОНГОЛЫН ТАЛААС ХҮСЛЭЭ

Эх орноо төлөөлөн гадаад улсад ажиллах консулууд онц ноцтой хэрэгт холбогдон Монгол Улсын нэр хүндийг олон улсын түвшинд шороотой хутгаж байгаа асуудлаар бид Гадаад харилцааны сайд Д.Цогтбаатараас тодруулан хүргэж байсан. Туркын Стамбул хотод суух консулын хоёр ажилтан хар тамхины хэрэгт холбогдохын зэрэгцээ БНХАУ-ын ӨМӨЗО-ны Хөх хотод суугаа консул Д.Мөнх-Эрдэнэ автомашины наймааны асуудалд холбогдсон нь энэ ярилцлагын үеэр ил болсон юм. Тэгвэл Д.Мөнх-Эрдэнийн эзэмшлийн Landrover /A005Y9/ болон Ерөнхий консулын газрын нэр дээр бүртгэлтэй гурван Benz /A395NH, A1234, A1137N/ автомашиныг хууль бусаар хил нэвтрүүлж худалдаалсан хэрэгт Д.Мөнх-Эрдэнийг сэжиглэн шалгаж байна. Энэ хэрэг үүссэн цагаас хятадын тал удаа дараа Д.Мөнх-Эрдэнийг БНХАУ-ын Контрабандтай тэмцэх газрынхан мөрдөн шалгаж, баримтжуулах ажиллагаанд хамтарч ажиллахыг хүссэн боловч өнөөдрийг хүртэл бодит хариу ирээгүй байгаа аж.

Монголын тал Ерөнхий консул Д.Мөнх-Эрдэнийн эдлэх онцгой эрх ямбыг цуцлах тухай албан бичгээр хятадын талд мэдэгдэж, БНХАУ-ын хууль тогтоомжийн дагуу мөрдөн шалгаж, баримтжуулах үйл ажиллагааг хэрэгжүүлэхийг хүлээн зөвшөөрөх шаардлага хүргүүлж байна. Машины ченж консулыг эргүүлэн татаж, хариуцлага тооцох асуудлаар салбарын сайд Д.Цогтбаатар "Энэ хэргийг Монгол Улс үйлдээгүй. Хувь хүн холбогдсон учир хувь хүний байр сууриар хэргээ шалгуулж, асуудлаа шийдэх ёстой. Үүнээс өмнө Монгол Улс консулаа эргүүлэн татвал гэмт үйлдлийг нь хаацайлсан мэт асуудал олон улсын түвшинд яригдана" гэсэн тайлбарыг хэлсэн байдаг. Консул Д.Мөнх-Эрдэнийн хууль бусаар хил давуулан зарсан автомашинуудыг худалдан авсан хятад иргэдийг энэ хэрэгт холбогдуулан цагдан хорьж шалгаж байгаа аж. Гэтэл Монгол Улсын консул ямар ч хариуцлага хүлээдэггүй, ажлаа хийсээр байгаа нь хувь хүний гэхээс илүүтэй улсын хариуцлагагүй, гадаад орны хуулийг хүндлэхгүй байгаагаар илэрч байгаа юм.