ХО ШИ МИНИЙ ЗАНДАШУУЛСАН ЦОГЦСЫГ СЭРГЭЭХ АЖИЛД ОРОСУУД ОРОЛЦОНО

Коммунист Вьетнамыг үүсгэн байгуулагч Хо Ши Миний занданшуулсан цогцосны хадгалалтыг сайжруулах багийн бүрэлдэхүүнд Оросын дөрвөн эрдэмтэн багтсан тухай "Antaranews" мэдээлж байна.

Хо Ши Минийг нас барсны дараа 1969 онд цогцсыг нь занданшуулж, Зөвлөлтийн тусламжтай байгуулсан тусгай бунханд, шилэн хоргоны цаанаа хүндэтгэн хадгалдаг болсон. Жил болгон олон мянган вьетнамчууд, гадаадын жуулчид Хо Ши Миний бунханыг үзэж сонирхохоор ирдэг болсон тул бэлэг тэмдэг, үзэл суртлын гэхээс илүүтэйгээр аялал жуулчлалын шоу үзүүлбэр болж хувирсан гэвэл онц хэтрүүлэг болохгүй гэсэн яриа гарах болсон.

Шинжээчдийн баг бүрдүүлэх тухай тушаалд "Эрдэмтэдийн зөвлөл нь тэргүүлэгч Хо Ши Миний бие ба эд эрхтэнүүдийг хадгалахад шаардлагатай төлөвлөгөө боловсруулах ёстой" гэжээ.

Зөвлөлт улсыг үүсгэн байгуулагч Ленины цогцсыг коммунизмын үзэл үүрд мөнх байхын бэлгэдэл болгон 1924 онд занданшуулж, бунханд хадгалах болсоноос хойш коммунист дэглэм ноёлж байсан болон одоо ч байгаа улсуудад өөрсдийн удирдагчдаа нас барсны дараа занданшуулан бунхалдаг болсон. Жишээлбэл, коммунист Хятадыг үүсггэн байгуулагч Мао Зэдун, Хойд Солонгосын үүсгэн байгуулагч Ким Ир Сен нарын цогцсыг Зөвлөлтийн мэргэжилтнүүдийн тусламжтайгаар занданшуулсан байдаг.