ФРАНЦАД ХЭТ ХАЛУУНЫ УЛМААС СУРГУУЛИЙН ШАЛГАЛТЫГ ХОЙШЛУУЛЖЭЭ

Францын дунд сургуулиудын төгсөлтийн шалгалтыг хэт халууны улмаас хойшлуулах болсон тухайгаа тус улсын Ардын боловсролын сайд Жан Мишель Бланкер мэдэгдсэн байна.

Францад заавал эзэмших ёстой боловсролын эхний шатны төгсөлтийн шалгалтыг зургаадугаар сарын 27, 28-ны өдрүүдэд авах ёстой байсан ч хойшлуулан долоодугаар сарын 1, 2-нд авахаар болж.

Халуун, бүгчим тасалгаад олон цагаар суух нь сурагчдад аюултай тул ийм шийдвэр гаргасан гэж сайд тайлбарлав. Гэхдээ Францад харьяалагддаг далайн арлуудын сурагчдад энэ хамаарахгүй аж.

Сүүлийн өдрүүдэд Франц, Герман, Швейцар, Бельгийн нутагт агаар хэт халж байгаа бөгөөд ойрын өдрүүдэд +40°C хүрнэ гэж мэдээлээд буй.