ЛАТВИ ЭСТОНЫ ХООРОНД “АРХИНЫ ДАЙН” ДЭГДЭЖ МАГАДГҮЙ

Латвийн парламент хатуулаг өндөртэй согтууруулах ундаанд ногдуулдаг акцизын хураамжаа 15 хувиар бууруулах шийдвэр гаргасан тухай "delfi.lv" мэдээлж байна.

Ингэснээр Латви дахь согтууруулах ундааны борлуулалтын хэмжээ унахаас сэргийлэх, татвар хэлбэрээр төсөвт орж ирдэг мөнгийг нэмэгдүүлэхийг зорьж байгаа юм байна.

Улс орнууд дийлэнхдээ архидан согтууралтай тэнцэх, багасгахын тулд акцизын үнийг нэмдэг байтал Латви бууруулах шийдвэр гаргасан нь болсон шалтгаан нь Финляндын жуулчид гэнэ. 2018 онд Латви нь татварын өөрчлөлт хийхдээ согтууруулах ундаанд ногдуулдаг татварыг эрс нэмэгдүүлж хил залгаад Литватай адил болгосон. Энэ нь хөрш Эстон улс дахь татвараас хавьгүй их байсан ч Эстони нь архины акцизын хураамжаа бүр ч бууруулсан. Үр дүнд нь Латвийн төсөвт багагүй орлого оруулдаг Финляндын жуулчдын урсгал архи нь хямдхан байдаг Эстонийг чиглэх болсон. Үүнээс болоод Латвийн согтууруулах ундааны борлуулалт унасан төдийгүй аялал жуулчлалын салбар нь нэлээд хүнд байдалд орсон байдаг.

Эстони улсыг архины акцизын хураамжаа буулгасан явдлыг Латвийн Ерөнхийлөгч Кришьянис Кариныц нь "худалдааны дайн өдөөсөн хэрэг" гэж шүүмжилж байсан билээ.