КОНГО УЛСАД УЛААН БУРХАН ӨВЧНИЙ ТАХАЛ ДЭГДЭЭД БАЙНА

Бүгд найрамдах Ардчилсан Конго улсын Эрүүл мэндийн яамнаас тус улсад улаан бурхан өвчний тахал дэгдээд байгааг албан ёсоор зарласан тухай “ВВС Africa” мэдээлж байна.

Одоогийн байдлаар Ардчилсан Конго улсын 26 мужийн 23-ынх нь хот суурин төдийгүй хөдөө орон нутагт улаан бурхан дэгдээд байгаа аж. Он гарснаас хойш энэ өвчнөөр өвдсөн 87 мянган тохиолдол албан ёсоор бүртэгджээ.

Улаан бурхан нь туйлын халдвартай ч зөв вакцин хэрэглэсэн нөхцөлд урьдчилсан сэргийлэх боломжтой байдаг. Гэвч Ардчилсан Конгод дэд бүтэц хөгжөөгүй, эмнэлгийн ажилтнуудын аюулгүй байдлыг бүрэн хангаж чаддаггүй, нийтийн эрүүл мэндийг хамгаалах систем хөгжөөгүйн улмаас вакцинжуулалт хангалттай явагдалгүй удаа дараалан тахал дэгдэж байжээ.

Он гарснаас хойш Конго улсын 1500 гаруй хүн улаан бурханаас нас барснаас дийлэнх нь 5 хүртэлх насны хүүхдүүд байсан. Үүнтэй холбоотойгоор “Хил хязгааргүй эмч нар” байгууллагаас гаргасан мэдэгдэлд улаан бурханы энэ удаагийн тахал нь 2011-2012 оны хүчтэй дэгдэлтийн хэмжээний олон хүний аминд хүрч магадгүй байгааг анхааруулсан байна.