ӨМНӨД СОЛОНГОСТ ЦАГААН БУДААНЫ ХЭРЭГЛЭЭ БУУРЧ БАЙНА

Өмнөд Солонгосын Хөдөө аж ахуйн эдийн засгийн төвөөс тус улсын хүнсний цагаан будааны хэрэглээ арван жилийн турш жил болгон 1,9 хувиар буурах болно гэсэн тухай “Yonhap News” мэдээлж байна.

Тус төвийн мэргэжилтнүүд “Европ хоол, хагас боловсруулсан хоолны хэрэглээ өсч байгаагаас хүнсэнд хэрэглэдэг цагаан будааны хэмжээ буурсаар байх болно” гэсэн байна.

Өмнөд Солонгосын нэг хүнд ногдох цагаан будааны хэрэглээ 1970-д онд 136,4 кг болж дээд цэгтээ хүрч байсан. Гэвч 1980-д оноос эхлэн хүнсэн дэх цагаан будааны хэмжээ буурч эхэлжээ. Бууралтын хэмжээ нь 1980-аад онд жилийн 1 хувь байсан бол 1990 оноос 2,3 хувь болж, 2000 оноо 2,6 хувь, 2010 оноос 2,3 хувь тус тус байсан байна.

Солонгосчууд гэрээс гадуур хоол идэх нь олширсон, өглөө ба өдөр, оройн хоолон дээр хэрэглэдэг цагаан будааны хэмжээ буурсан нь хэрэглээ нь ийнхүү жилээс жилд буурахад хүргэж байгаа аж.