ПОЛЬШ F-35 СӨНӨӨГЧ БӨМБӨГДӨГЧ ХУДАЛДАЖ АВАХААР БОЛОВ

АНУ-ын Ерөнхийлөгч Дональд Трамп нь F-35 Польшд тавдахь үеийн сөнөөгч бөмбөгдөгч онгоц худалдах шийдвэр гаргасан тухай “Reuters” агентлаг мэдээлэв.

Дональд Трамп нь өөрийн Захиргаанд болсон нэгэн арга хэмжээний үеэр “Польш F-35 онгоц худалдан авах гэж байгааг бид тэмдэглэж байна” гэж ам алдсанаас үүдэн ийм дүгнэлт хийжээ. Польш нь бүр Зөвлөлтийн үед үйлдвэрлэгдсэн хуучин онгоцуудаа сольж, Америкийн хамгийн сүүлийн үеийн F-35 онгоц 32 ширхэгийг худалдан авах хүсэлтээ Цагаан ордонд гаргаад байсан юм.

Тавдахь үеийн сөнөөгч бөмбөгдөгч F-35 онгоцыг зохион бүтээх, сайжруулах төсөл нь одоо хүртэл үргэлжилж байгаа бөгөөд түүнд 1 их наяд орчим ам.доллар зарцуулаад байгаа юм. Гурван хувилбараар үйлдвэрлэгдэж байгаа энэ онгоцын хамгийн хямд F-35А нь 89,2 сая долларын үнэтэй. F-35 сөнөөгч бөмбөгдөгч онгоцыг Их Британии, Австрали, Турк, Итали, Канад, Норвег, Нидерланд, Дани, Израиль, Япон, Өмнөд Солонгос улсууд худалдан авах гэрээ байгуулсан, эхнээсээ зарим орнуудад очоод байгаа юм. Гэвч Туркийг Оросын С-400 агаарын довтолгооноос хамгаалах цогцолбор худалдан авч байгаа тул F-35 онгоц нийлүүлэхгүй болоод байсан юм. Туркийн авах ёстой байсан онгоцуудыг ийнхүү Польшд нийлүүлэхээр болж байгаа бололтой.

Гэвч энэ наймааны тухай албан ёсны мэдэгдэл хийгдээгүй байна.