КИРГИЗИЙН ПАРЛАМЕНТЫН ГИШҮҮДИЙГ “НУС” ГЭЖЭЭ

Киргиз улсад Шанхайн хамтын ажиллагааны байгууллагын гишүүн орнуудын Төрийн тэргүүнүүдийн уулзалт болж байна. Том бага олон орны төрийн тэргүүнүүдийг угтах гээд тус улсын Ерөнхийлөгч Сооронбай Жээнбеков, Ерөнхий сайд Мухаммедкалый Абылгазиев нар нь өчүүхэн ч завгүй байгаа бол парламент нь харин тэс өөр зүйлд санаа зовоод зочид ирснийг ч анзаарах сөхөөгүй байгаа бололтой.

Regnum.ru сайтын мэдээлж байгаагаар Киргизийн экс ерөнхийлөгч Алмазбек Атамбаев нь өөрийн намын дэмжигчидтэй уулзахдаа “өмнөх парламент бол өөр байсан, одоогийн энэ чимкирик /нус/-үүд шиг байгаагүй” гэж хэлсэнд гишүүд нь ихэд уурлан бухимджээ. Парламентын гишүүд нь “Экс Ерөнхийлөгч парламентыг удаа дараалан “чимкирик” гэж дуудаад байдаг. Яагаад парламент дуугүй байна гэж нийгэмд яриа өрнөөд байна.Энэ парламентад  Киргизийн ард түмний элит,улс төрийн элит сууж байгааг та нар харж байна”, “Атамбаев ард түмнийг өдөөн хатгаж байна. Гурав дахь хувьсгал хийхийг хүсч байна” гэж бухимдалаа өрдсөөр Атамбаевын халдашгүй эрхийг халах тогтоол батлан Парламентын даргадаа барьсан байна. Хэрэв экс Ерөнхийлөгч халдашгүй эрхээ алдвал эрүүгийн хэрэг үүсгэн шалгах, байцаах боломжтой болох юм.

Атамбаевыг шүүмжилсэн гишүүд нь түүнийг цахилгаан станцын засвараас мөнгө “цавчсан”, түүхийн музей ба зам засвараас мөнгө идсэн, Киргизийн мафийн толгойлогч гэгддэг Азиз Батукаевыг хууль бусаар шоронгоос сулласан гэх мэт олон хэргийг дурдан тус бүр дээр нь мөрдөн байцаалт явуулж шалгах ёстой гэжээ.