АМЕРИКИЙН ТАГНУУЛЫН ОНГОЦУУД ОРОСЫН ЭРЭГ ОРЧИМ ОЛНООР НИСЭХ БОЛЖЭЭ

Сүүлийн өдрүүдэд Америкийн зэвсэгт хүчний тагнуулын онгоцууд Оросын хилийн орчим хэт эрчимтэй нислэг үйлдэх болсон тухай “PlaneRadar” мэдээлжээ. Улс гүрнүүдийн хооронд ноцтой хурцадмал байдал үүсэх, дайн тулаанд бэлдэх үеэр тагнуулын нислэгийг тоо огцом нэмэгддэг тул ийм байдал Оросын эрх баригчдад таалагдахгүй байгаа нь мэдээж.Оросын Хар тэнгисийн эрэг орчмын дагуу АНУ-ын Тэнгисийн цэргийн хүчний “Lockheed ЕР-3Е Aries II” онгоц нислэг үйлдэж байна. Энэ онгоц Грекийн Крит арлаас хөөрч, Крымийн хойгийн хажуугаар Новороссийск хот руу ойртоод буцахдаа Севастополь хотын орчим ниссэн.

Мөн л Крымийн хойгийн орчимд нь АНУ-ын Цэргийн нисэх хүчний радиоэлектрон тагнуулын “Boeing RC-135V Rivet Joint” онгоц нислэг үйлдэж байна. Энэ онгоц бас л Крит арлаас хөөрсөн.

Оросын баруун хилийн орчим АНУ-ын Цэргийн нисэх хүчний стратегийн тагнуулын нисгэгчгүй онгоц “RQ-4B Global Hawk” нислэг хийж байна. Энэ онгоц Италийн Сицил арал дээрх НАТО-ийн Сигонела нисэх баазаас хөөрөөд Латви ба Эстони улсуудын нутгаас Орост ойртон Псков, Ленинград мужуудын газар нутгийг тагнаж байна.

Мөн АНУ-ын Тэнгисийн цэргийн хүчний шумбагч онгоц ангуучлагч “Boeing P-8A Poseidon” онгоц Хар тэнгисийн дээгүүр эргүүлийн нислэг үйлдэж байна.Сүүлийн үед зөвхөн АНУ гэлтгүй НАТО –ийн гишүүн орнуудын тагнуулын онгоцууд, дронууд Оросын хилийн ойролцоо нислэг үйлдэх нь эрс нэмэгдээд байгааг мэргэжилтнүүд онцолж байна.

Орчуулсан: Б.Бадрал