ЖОМОЛУНГМА ХОГИЙН ЦЭГ БОЛОН ХУВИРЧЭЭ

Дэлхийн ноён оргил Жомолунгма буюу Эверест нь хогийн цэг болж хувираад байгаа тухай “Mirror” мэдээлж байна.

Шерп үндэстний 20 уулчин бүхий бүлэг дулааны улирал эхэлж цас хайлах үеэр Эверестийн орчмын хог цэвэрлэх ажиллагааа явуулаад 11 тонн хог түүж, 4 хүний цогцос илрүүлжээ. Эверест нь өвөлдөө цасаар хучигдаад хог, хаягдал нь харагддаггүй ч дулаарч цас хайлахад энд тэндгүй хог гарч байгалийн үзэмж, нутгийн экологи, бүс нутгийн өндөр уулсаас эх авдаг гол горхинуудыг илүүтэй хордуулж эхэлдэг. Дэлхийн хамгийн өндөр оргилд гарах гэсэн уулчид, жуулчид жилдээ хэдэн мянган хүчилтөрөгчийн сав, уранхай майхан, уяа холбоос, эвдэрсэн шат, нөөшний сав, шоколодны гялгар цаас зэргийг эрээ цээргүй юмгүй хаядаг нь Эверестийг хогийн цэг болгон хувиргажээ.

Энэ жил Эверестийн орчим цаг агаарын онцгой таатай нөхцөл бүрдсэн тул аятай боломжийг тааруулан оргил дээр нь гарах гэсэн жуулчид, аялагчид урт дараалал үүсгэн зогсох хэрэг гарчээ. Ингэж хүлээх зуур хүчилтөрөгчийн дутагдал, их хүйтэн зэргийн нөлөөгөөр 11 хүн нас барсан эмгэнэлт явдал гарсан юм.

Орчуулсан: Б.Бадрал