КУРИЛЫН АРЛУУДЫГ ЗЭВСГИЙН ХҮЧЭЭР БУЦААХЫГ САНАЛ БОЛГОСОН УЛС ТӨРЧИЙГ ОГЦРОХЫГ УРИАЛАВ

Японы парламентын доод танхим нь өмнөд Курилын арлуудыг зэвсгийн хүчээр Оросоос буцаан авахыг санал болгосон улстөрч Ходаку Маруяамаг парламентын гишүүнээс сайн дураар огцрохыг уриалсан тогтоол баталжээ. Парламентын гишүүдийн дуу нэгтэй дэмжсэн энэхүү тогтоол нь заавал гүйцэтгэх албагүй тул ийнхүү сайн дураар огцрохыг уриалсан аж.

Дэлхийн хоёрдугаар дайны үр дүнгээр Зөвлөлтийн мэдэлд шилжиж, ЗХУ-ын задран унасны дараа Оросынх болсон Өмнөд Курилын арлуудыг Япон нь өөрийн газар нутгийн нэг хэсэг үздэг, эргүүлж өгөхийг ч хүчтэй шаарддаг. Орос нь эдгээр арлыг Японд эргүүлэн өгөх нь Дэлхийн хоёрдугаар дайны үр дүнд баталсан олон улсын бүх гэрээ, тохиролцоонд үл нийцсэн, зөрчин үгүйсгэсэн хэрэг болно гээд хүлээж авахаас татгалздаг. Үүнээс болоод Япон ба ОХУ-ын хооронд дайн дууссаны дараах энхийн гэрээг одоо хүртэл байгуулаагүй байгаа юм.

Ходаку Маруяама нь япон жуулчдын бүрэлдэхүүнд багтан маргаантай арлуулаад зочилохдоо архин ууж согтож, арлуудыг зэвсгийн хүчээр эргүүлэн авах тухай яриа өрнүүлсэн байна. Ингэснээр оросуудын дургүйцлийг төрүүлээд зогсохгүй парламентын гишүүний хувьд олон улсын маргааныг зэвсэг хэрэглэн шийдэхээс татгалзах тухай Япон үндсэн хуулийн заалтыг зөрчсөн хэрэг болсон юм.

Хэргийн эзэн өөрийгөө үндсэн хуулийг зөрчөөгүй, цэвэр онолын хүрээнд, таамаг байдлаар зэвсгийн хүчээр эргүүлэн авах тухай яриа өрнүүлсэн гэж мэдэгдэж байгаа аж.