АЛАБАМАД ХҮЧИРХИЙЛЭГЧДИЙГ ХИМИЙН АРГААР ТАЙГАЛАХ ХУУЛЬ БАТАЛЖЭЭ

АНУ-ын Алабама мужийн парламент тус мужид насанд хүрээгүйчүүдийн эсрэг бэлгийн гэмт хэрэг үйлдсэн этгээдүүдийг химийн аргаар тайгалж байх хуулийг баталсан байна. Мужийн парламентын баталсан хуулийг амбан захирагч баталгаажуулж гарын үсэг зурснаар гурван сарын дараанаас үйлчилж эхэлнэ гэж хүлээж байна.

Шинэ хуулийн дагуу 14  хүрээгүй хүүхэдтэй бэлгийн харилцаанд орсон гэмт хэрэгтнүүдийг химийн аргаар тайгалах ажилбар хийсний дараа л хугацаанаас нь өмнө суллах боломжтой болох юм. Химийн аргаар тайгална гэдэг нь тусгай химийн бодис өгөх замаар бэлгийн дур хүсэл, түрэмгийн зан төрүүлдэг тестостерон нэртэй гормоны ялгаралтыг нь эрс багасгаж эсвэл бүр зогсоодог. Үр дүнд нь эрэгтэй хүн сексийн дур хүсэлгүй, түрэмгийн ааш авиргүй болно. Үүнээс болж энэхүү аргыг хүнлэг бус, хүний эрхийг зөрчсөн гэж шүүмжлэх нь цөөнгүй.

Энэхүү хуулийг санаачилсан Бүгд найрамдах намын Стив Хэрст “Энэ хуулийг хүнлэг бус гэж шүүмжлэх нь лавтай. Гэтэл өөрийгөө хамгаалах чадваргүй жаахан хүүхдэд бэлгийн дарамт үзүүлэхээс илүү хүнлэг бус юм гэж юу байх вэ?” гэсэн байна. АНУ-ын гурван мужид хүчирхэлэгчдийг химийн аргаар агтлах хуультай.