АНУ-ААС ТАЙВАНД ХОЁР ТЭРБУМЫН ЗЭВСЭГ ЗАРЖ МАГАДГҮЙ

АНУ нь Тайваньд нийт 2 тэрбум ам.долларын зэвсэг зарахаар төлөвлөж байгаа тухай “Reuters” агентлаг мэдээллээ. Америкчууд “М1А2” танк, танк эсэргүүцэгч ба агаараас хамгаалах пуужин зарах гэж байгаа бололтой. Америкийн хуулийн дагуу гадаадад зэвсэг худалдахдаа Конгрессийн зөвшөөрөл авах ёстой байдаг. Тайваньд их хэмжээний зэвсэг зарах гэж байгаа тухайд Америкийн Батлан хамгаалах яам, Төрийн департамент нь Конгресст хэдийн мэдэгдсэн юм байна.Хятад ба Америкийн харилцаа худалдааны дайнаас болоод тааруухан байгаа тул Конгресс энэ хүсэлтийг нь ёсоор болгох магадлал их.

Энэ мэдээг БНХАУ хүчтэй эсэргүүцэн хүлээж авах нь гарцаагүй. Учир нь, манай урд хөрш Тайванийг өөрийн нутаг дэвсгэриийн салшгүй хэсэг гэж үздэг бөгөөд тусгаарлах гэсэн бүх л оролдлгыг ширүүн эсэргүүцдэг. Харин АНУ нь Тайванийг хэзээнээс л их газрын Хятадаас тусгаар улс байлгах сонирхолтой тул арлын эрх баригчдыг шаардлагатай зэвсэг, байлдааны техник хэрэгслээр ямагт хангасаар ирсэн. Хятад нь Тайванийг тусгаарлах гэсэн бүх л оролдлогод хатуу хариу өгнө гэдгээ хэдхэн өдрийн өмнө Сингапурт болж өнгөрсөн “Шангри Ла- яриа хэлэлцээр” форумын үеэр мэдэгдэж байсан. Тус хэлэлцүүлэгт оролцсон БНХАУ-ын Батлан хамгаалахын сайд Вэй Фэнхэ нь Тайванийг тайван замаар нэгтгэх бүх л боломжийг эрэлхийлэх хэдий ч Хятадын ардын чөлөөлөх армийн хүсэл зорилго ба шийдэмгий байдлыг дутуу үнэлэх хэрэггүй гэдгийг тус арлын эрх баригчдад анхааруулсан байна.

Орчуулсан: Б.Бадрал