ХЭРГИЙН ГАЗРААС АЛДАГДСАН БУУГ АРХИНЫ БАРЬЦААНД ТАВЬСАН БАЙЖЭЭ

-ТАЛИЙГААЧ ГЭРЭЭСЛЭЛДЭЭ "ХҮНД ӨВЧНИЙ УЛМААС ӨӨР АРГА БАЙСАНГҮЙ" ГЭЖЭЭ-

Өчигдөр буюу энэ сарын 26-ны үүрийн 6 цаг орчимд 100 айлын автобусны буудлын баруун талд эрэгтэй хүн духан тус газартаа бууны шархтай нас барсан хэргийн талаар бид мэдээлсэн. Дээрх хэргийн мэдээлэл цагдаагийн байгууллагад өглөөний 6 цагт иргэнээс ирсэн аж.

Албаны эх сурвалжийн хэлж буйгаар амь хохирогч 61 настай Ж нь ТОЗ-8 маркийн ангийн буугаар өөрийгөө буудаж хөнөөсөн байж болзошгүй нөхцөл урьдчилсан байдлаар илэрсэн гэх ба хэргийн газарт байсан буу цагдаагийн алба хаагчдийг очиж шалгахад алга болсон байсан аж. Мөн талийгаачийн гараас сумны дарь илэрсэн гэсэн мэдээллийг өгсөн билээ.

Энэхүү олныг цочирдуулсан хэргийн мэдээлэл цацагдаж эхэлмэгц олон нийтийн дунд "Гудамж талбайд хүнийг буудаад явчихсан байх" зэргээр олон таамаг өрнөж буй. Эл хэргийг тодруулбаас, талийгаач эрэгтэй 61 настай Ж нь өөрийгөө буудсан нь үнэн бөгөөд гэрээслэл бичсэн байсан тухай албан бус эх сурвалж мэдээлсэн юм.

Гэрээслэлдээ бичихдээ: "Хүнд өвчний улмаас өөр арга байсангүй. Тэсвэрлэшгүй их өвдөлт вэ" гэсэн утга бүхий үгсийг бичиж үлдээж, хүүгийнхээ утасны дугаарыг бичсэн байжээ.

Харин хэргийн газарт байсан бууг талийгаачийн ойролцоогоос 41 настай архины хамааралтай эмэгтэй О нь авч улмаар Дарь эхийн орчим байх хүнсний дэлгүүрт 6000 төгрөгийн үнэ бүхий архиар сольж уусан байна. Дээрх үйлдийг МБА-ны Онц хүнд гэмт хэрэгтэй тэмцэх тасгийн мөрдөгчид шуурхай илрүүлэн хэргийн газраас бууг авч явсан иргэнээс тайлбар мэдүүлэг авсан байна.

Түүнчлэн энэхүү хэргийг харсан гэрч байвал цагдаагийн байгууллагад хандахыг ЦЕГ-ын ХМТ-ийн дарга, цагдаагийн дэд хурандаа Б.Баатархүү мэдээлэл хийх үеэрээ хэлсэн билээ.

Уг хэргийг харъяаллын дагуу Сүхбаатар дүүргийн цагдаагийн нэгдүгээр хэлтэст мөрдөн шалгаж эхэлсэн байна. Манай улсад нийтээр дагаж мөрдөн хуулинд гудамж талбай, олон нийтийн газарт буу авч явахыг хориглосон байдаг аж.

Одоогоор хэрэгт хамаарал бүхий этгээдүүдийг олж тогтоон тайлбар мэдүүлэг авч эхэлсэн бөгөөд бууны гарал үүслийг тогтоохоор ажиллаж байна. Харин эцсийн байдлаар шүүх эмнэлгийн шинжилгээний дүгнэлт гарахаар хэргийн учир тайлагдах юм.