ХОЙД СОЛОНГОС ШИНЭ ЗЭВСЭГ ТУРШЖЭЭ

Хойд Солонгосын удирдагч Ким Жон Ун өчигдөр буюу лхагва гаригт Батлан хамгаалах ухааны академийнхаа бүтээсэн шинэ үеийн "тактикийн-удирдлагатай" зэвсэг турших үйл ажиллагаанд оролцсон болохыг тус улсын төрийн мэдлийн "KCNA" агентлаг мэдээлсэн байна.

Эх сурвалжид уг шинэ үеийн зэвсгийн талаар нарын мэдээллийг дурдаагүй ч зэвсгийг алсаас удирдан хэд хэдэн бай, үүний дотор хөдөлгөөнт байг устгах туршилт амжилттай болсныг цохон тэмдэглэсэн юм. Уг зэвсэг нь алсын удирдлагатай ойрын зайн сөнөөгч пуужин байх өндөр магадлалтай гэж шинжээчид дүгнэсэн байна. Шинжээчид хэрвээ Хойд Солонгос ийм төрлийн технологийг амжилттай туршсан бол алсын тусгалтай баллистик пуужинг замаас нь устгах бүрэн боломжтой болсон гэсэн үг хэмээн тайлбарласан юм.

Харин олон улсын улс төрийн тоймчид энэхүү явдлыг өнгөрөгч хоёрдугаар сарын 27, 28-нд болсон хоёр дахь дээд хэмжээний уулзалт амжилтгүй болсноос хойш Хойд Солонгосын талаас албан ёсоор зарласан анхны зэвсэг турших ажиллагаа байсныг онцлов. Мөн үүнийг Хойд Солонгосын удирдагч Ким Жон Уны зүгээс АНУ-ын Ерөнхийлөгч Доналд Трампад шахалт үзүүлж буй хэрэг гэж харж байна. Тэрээр өнгөрөгч даваа гаригт Ерөнхийлөгч Доналд Трампад хандан гурав дахь дээд хэмжээний уулзалтыг хийхийг уриалсан юм.

Одоогоор Цагаан ордны зүгээс зэвсэг туршсан талаар албан ёсны тайлбар хийгээгүй байгаа бөгөөд Ерөнхийлөгч Доналд Трамп Хойд Солонгосын удирдагч Ким Жон Уны уриалгад хариу хүргүүлээгүй байна.

Эх сурвалж: TASS