ТАЙЛАНДАД МОНГОЛЧУУД ХУЛГАЙ ХИЙСЭНТЭЙ ХОЛБООТОЙ ЭЛЧИН САЙДЫН ЯАМНААС АНХААРУУЛГА ГАРГАЖЭЭ

Монгол Улсын иргэд Тайланд улсад хулгай хийж байгаад баригдсан хэд хэдэн тохиолдол сүүлийн үед гарсан. Үүнтэй холбогдуулан Монгол Улсаас тус улсад суугаа Элчин сайдын яамнаас анхааруулга гаргасан байна.

Уг анхааруулгадаа "Сүүлийн үед Тайландын хаант улсад зорчих манай иргэдийн урсгал нэмэгдэхийн хэрээр хулгайн гэмт хэрэгт холбогдох явдал эрс нэмэгдэж байна. Ялангуяа, гадаадын жуулчид олноор цуглардаг үзвэр, үйлчилгээний газар, нийтийн тээвэр болон олон улсын нисэх онгоцны буудалд зарим монгол иргэд хулгай хийж байгаад үйлдэл дээрээ баригдаж саатуулагдсныг Тайландын болон олон улсын хэвлэл, мэдээллийн хэрэгслүүдээр мэдээлж байна. Энэ нь Монгол Улсын нэр хүндэд сөргөөр нөлөөлж, улмаар Тайланд улсад зорчиж буй манай иргэдийг тус улсын хилээр нэвтрэхэд нэмэлт анкет бөглүүлэх, биедээ авч явж буй бэлэн мөнгө болон зээлийн картын мэдээллийг нь шаардах боллоо. Иймд гадаад улсад аялж буй иргэдэд хариуцлагатай аялахыг анхааруулж байна.

Тайланд улс жилдээ 37 сая гаруй гадаадын жуулчин, давхардсан тоогоор 65 сая гаруй гадаадын иргэдийг хүлээн авдаг. Тус улсын Засгийн газар гадаадын жуулчдын аюулгүй байдлыг хангах, тэдний тав тухтай байдлыг бүрдүүлэхэд онцгой анхаардаг бөгөөд гадаадын жуулчдад хохирол учруулсан дотоод болон гадаадын иргэдэд хуулийн дагуу хатуу шийтгэл оногдуулдаг болохыг анхаарна уу" гэжээ.